Somalimirror : Wadahadalka idin dhexmaray itoobiya  qaybtiisii koobaad maxay ahayd? Mase lagu guuleystay?

Sheikh ibraahim: Wadahadalka qaybtiisii koobaad waxay bilaabatay 15/2/20210 wuxuuna ka bilawday yurubrub ka dibna wadanka Africaan ah ayaa ku xigay. Waxaana ka soo baxay xabad joojin 3 bilood ah.

Saddexdaas bilood  gudohooda waxaan qorshaysanay inaan qabano shirwayne Jabhadda u gooni ah iyo Shirwayne la tashi Shacab ah. Ilaahay mahaddiis mid walibana sidaan ugu tala galay ayuu u dhacay oo shirwaynihii jabhaddu wuuu qabsoomay kii la tashiga dadwaynuhuna wuu qabsoomay oo waxay ka dheceen labaduba gobalka Goday intii u dhaxaysay 4-8/5/2010.

Labada shirbana waxaa ka soo baxay: In lasii wado wadahadalka nabadda ee u dhexeeya UWSLF iyo Ethiopia. Sidaa darteed waxaan dhihi karnaa si guul ah ayay ku dhamaatay qaybtii koobaad ee wada hadalka.

Somalimirror : Qaybta labaad ee wada hadalka wax ma nooga sheegi karta?

Sheikh ibraahim : Qaybta 2aad ee wadahadalku waxay bilaabanaysaa ka dib markii uu go,aamiyay Shirwaynaha Shacabku in lasii wado geeddi socodka wada hadalka, Golaha Shuurada jabhaduna asixiyay go,aankaas ayaa waxaa la magacaabay guddi wada hadal oo matalaya Shacabka S/Galbeed iyo Jabhada kaas oo mar dhaw u safri doona dibadda si uu wadahadal ula yeesho dawlada Ethiopia.

Somalimirror : Guddiga wadahadalku muxuu xambaarsanyahay oo ugu wayn Ajandhiisa uu hordhigi doono Dawlada Ethiopia?.

Sheikh ibraahim: Gudiga wada hadalku wuxuu wataa waraaq wadahadal oo aad looga soo baaraan dagay oo ay wada gorfeeyeen xubnaha ka soo qayb galay shirarka aan soo sheegnay, ururukuna uu dib u eegay, Waxayna warqaddaasi ka koobantahay: Ajande Siyaasadeed, Mid dhaqaale, Mid Amni, Xorriyadda aasaasiga ah, Maxaabiis, Horomarin, iyo ajandayaal kale oo si faahfaasan loo soo bandhigi doono.

Somalimirror : Wax tusaya niyad wanaag labada dhinac ah oo ilaa hada la sameeyay ma jiraa?.

Sheikh ibraahim : Haa way jirtaa oo waxaa kow ka ahba Xabad joojinta, In la kala joojiyay dacaayadii dagaal ee labada dhinac ahayd, Maxaabiis badan oo qaybna la sii daayay qaybna Usbuucan la sii dayn doono inshaa allaah,waxaana rajeynayaa in dadka reer soomaaligalbeed aad ugu farxi doonaan soo deyntooda, maxaabiistaasina kuma koobna xubnaha ururkayaga oo kaliya ee waxaa ku jira dhammaanba qaybaha bulshada wixii siyaasad u xidhan, Wax keeni kara niyad wanaag la,aan oo ilaa hada noo muuqdana ma jiro.

Somalimirror : Maxaa kasoo baxay Shirwaynihii la tashiga Shacabka iyo kii jabhaddaba?

Sheikh ibraahim : Waxaa ka soo baxay labada shirba in lasii wado geedi socodka wada hadalka nabadda ee dhax maraya Ethiopia iyo JMXSG, qodobbadii shirkana horay ayaa saxaafadda loo siiyay.

Somalimirror : Shacabka soomaali galbeed side ayuu u arkaa arkaa barnaamijka wadahadalka ee u dhexeeya jabhaddiina iyo Ethiopia?.

Sheikh ibraahim : Wada hadalkaba waxaan u galnay waxay ahayd codsi isdaba joog ah oo nooga imaanayay Shacabkayaga gudo iyo dibadba, gaar ahaan Ugaasyada, Culimada, Aqoonyahanka, Qurba joogta & indheer garadka oo dhan. Waxaana tusaala dhab ah u ahaa arintaas Shirwaynihii la tashiga shacabka ee ka dhacay Goday kaas oo ay kasoo qayb gashay inka badan 1500 oo qof oo ka kala yimid dibad iyo gudeba dhammaantoodna waxay xoojiyeen dadaalka ururka eek u aaddan waxa xaajoodka nabadda.

Somalimirror : Maxaad noqon doontaan haddaad heshiisaan idinka iyo Ethiopia? Ma urur siyaasiya ayaad noqon doontaan mise dad Ducaad ah?.

Sheikh ibraahim: Kolayba arintaas waxaa iska leh golaha shuurada ee Jabahada looga taliyo isagaana cadayn doona hawshaas, waxaanse kuu sii sheegi karaa inaan noqon doono dad Dalkooda, Diintooda, & Dadkoodaba u adeega dhanwalba.

Somalimirror : Maxaad ugu baaqaysaan Jabhada ONLF oo iyadu wali dagaalka sii wadda?.

Somalimirror : Waxaan u mahad celinaynaa Jabahada ONLF garabka Golaha sare sida wanaagsan ay noogu taageereen barnaamijka wada hadalka. Waxaana ka xumahay Jabhada ONLF garabka Mahamad Cumar Cismaan inaan ka waynay wax wada qabsi wakhtigii dagaalka, Maanta oo wada hadal nabadeed bilawdayna uu diiday inaan wadajir u galno. Iyaga oo noo Ictiraaftay inay 3jeer hortayo ay wada fadhiisteen Ethiopianka laakiin ay diideen inay annaga oo walaalohood ah inaan wada fadhiisanno.

Waxaan ugu baaqi lahaa Garabka Admiraal mahamad cumar inay inay nala gartaan in gacmo wada jir wax ku gooyaan col iyo nabadabana walaalkaa aadan ka maarmin annagu urur ahaan aad baan u tabaynaa una raadinaynaa iayagana waxaan rajeyneynaa inaan ka helno dareen kaas la mid ah, si aan wax ugu wada qabanno shacabkayaga duruufaha adagi haystaan.

Somalimirror :  sheekh ibraahim assalaamu caleykum

Sh.ibraahim: wacalykumussalaam waraxmatullaahu wa barakaatuthu

Somalimirror: sheekh ibraahim waxaa jira su,aalo la iska weydiinayo haeshiis xabbad joojin ah oo aad itoobiya la gasheen waxaana jecelnahay inaad kulankan arrintaas faahfaahin naga siiso.

Sh.ibraahim: marka hore bahda somalimirror aad baad ugu mahadsantihiin sida hufnaanta leh e aad u matasheen saxaafadda islkaamiga ah aad baana ugu faraxsanahay kulankiinna iyo inaan su,aalihiinna ka jawaabo.

Somalimirror:guddoomiyaha golaha shuurada ee ururukiinnu wuxuu sheegay inaad itoobiya xabbad joojin la saxiixateen arrintaas maxaa ka jira mase ku wada socotaan?

Sh. Ibraahim: Haa Heshiiskaas wuu jiraa  waana kuwada soconaa waana heshiis aan aniga  Gudoomiyaha ururka ahi amray Guddoomiyaha golaha Shuuradana anigaa u xilsaaray  inuu hogaamiyo guddiga wada hadalka.

Somalimirror: heshiiskan idin dhexmaray itoobiya waa mid noocee ah?

Sh.ibraahim: Heshiiska na dhaxmaray annaga iyo Ethiopia waa mid ku meel gaar ah oo xabad joojin 3bilood ah . Sadaxdaa bilood gudohoodana waxaa kulmi doona Golaha Dhexe ee ururka UWSLF oo go,aamin doona in horay loo sii socdo oo heshiis dhmmeystiran lala gaadho itoobiya iyo in kale iyada oo laga duulayo warbixinta uu golaha fulintu ka soo gudbin doono natiijada ka dhalata xabbadjoojinta iyo khiyaaraadka ururuka horyaalla xilligan.

somalimirror: maxaa sababay inaad heshiis noocan ah xilligan gashaan?

Sh. Ibraahim : Waxyaabaha sababay heshiiskan inaan galno way badanyihiin, waxaana ka mid ah:

1-    Horta asal waxaa ah wixii wada hadal lagu dhamayn karo inaan dagaal lagu raadinin maxaa yeelay sidaas ayaa kharash iyo dhibba yar.

2-  Waa Asal Islaami ah in Cadawga lala hadli karo siduu nabiguba sameeyayصلى الله عليه وسلم  sida heshiiskii Xudaybiya oo qodobadiisa ay ka mid ahayd in ninkii soo Islaama gaalada loo celiyo ka muslimiinta kasoo gaaloobana aan loo celinin hadana Ilaahay uu ku magacaabay Fatxi.

3-    Waaqica jirana maanta wuu keenayaa:

(a)  Shacabkayaga oo runtii maraya xaalada adag oo dhan walba ah (Xaga nolosha, Wax barashada diineed iyo maaddiba, Caafimaadka, IWM) oo u baahan inuu helo wakhti iyo waayo munaasib ah oo uu ku maareeyo mashaqada haysata si uu wax uga baddalo xaaladdiisa nololeedM, waxaa intaas sii dheer shacabku wuxuu soo maray wakhti ku dhow 20 sano oo usan ka nasanin dil,  dhac, kufsi, qixin iyo xabsi IWM inaan shacabkayaga nasinno intii suura gal ahna garbay nagu tahay.

(b)   Ururka oo u baahan inuu helo jaanis uu ku fakaro oo uu isku arko kuna tashado kuna qiimeeyo marxaladda uu marayo.

(c)    Dawlada Ethiopia oo muujisay inay diyaar u tahay wada hadal horaanna ka dhaga adeygi jirtay.

Intaas oo sababood iyo kuwa kale oo aana sheegin ayaa sababay inaan qaadanno heshiiskan ku meel gaarka ah.

Somalimirror : halkee ayuu ka dhacay heshiiskani side ayuuse ku yimid?

Sh. Ibraahim : Waxaana dhax maray laba kulan oo mid uu ka dhacay wadan yurub ah,  kan kalana wuxuu ka dhacay waddan  African ah oo aan itoobiya iyo soomaaliya midna aheyn. Wakhtiguna wuxuu ahaa bishii 2aad iyo bishii 3aad 2010. Wuxuuna ku yimid dad ayaa noo kala dabqaaday labadayada dhinacba aan ku kalsooneyn.

somalimirror: ma u maleyneysaa in ay itoobiya ka dhabeyneyso hashiiskan ay idinla gashay?

Sh. Ibraahim : Horta  wadahadalkani ma aha kii 1aad ee na dhaxmara Ethiopia. Kani waa wada hadalkii 8aad ee na dhax mara.  Lix wada hadal waan ku kala kacnay midna xabad joojin 6billood ayaan kala saxiixanay waxayna ahayd 1996kii. Ka dibna dagaalkii ayaa horay kasii bilawday markii la siku fahmi waayay rabitaannadii labada dhinac, Kan maanta ahna wuxuu la xiriiraa kuwaas hore. Anagu dhinacannaga waxaan isku dayaynaa sidii caadadaba noo ahaan jirtay inaan ilaalinno wixii aan isku waafaqno, Xaga Ethiopiana sidaas ayaan ka rajaynaynaa.

Somalimirror: ma isleedihiin hashiiskani haddii uu taabbo galo wuu xaqiijin doonaa himiladii dadweynaha reer soomaali galbeed?

Sh. Ibraahim : Hishiiskani haduu taaba galo waxaan isleenahay wax badan ayuu usoo kordhin doona shacabka ree soomaali galbeed. Marfka loo gudbo marxaladda 2aad ee wada hadalkana waxaan miiska soo dhigi donnaa rabitaanka shacabkayaga iyo himilooyikiisii, wada hadalkuna waa dagaal aan hubeysneyn wixii aan u aragno inuu shacabkayaga anfacayana waan qaadaneynaa wixii aan u aragno in uusan bulshadayada wax tar u aheynna ma aqbali doonno.

Marka aan sidaas leeyahay uma jeedo wax walba oo dadkayagu rabay way heli doonaan waxaanse u jeedaa wixii wax ku ool ah ee ka fiican sidan maanta ay ku jiraan, wixii naga dhimmanaadana waan u sii habeen dhaxeynaa wax kasta oo aad rabtana hal mar  lama wada helo, wixii aan la wada heleyninna lagama wada tago, xikmadduna waxay keeneysaa in wixii ku anfaca ee aad heli karto aad qadato waxa dhimanna aad raadiso sidii aad ku heli laheyd.

Somalimirror: ururka ONLF ee isaguna itoobiya la dagaallama arrintan ma ka wada socotaan?

Sh ibraahim : haddii aan nahay ururka UWSLF waxaan ku qanacsannahay in aanaan kala maarmin annaga iyo ururka ONLF qaddiyaddayaduna ay mid tahay waxaase caqabad nagu noqotay in hoggaana ururka ONLF aanaan ka helin dareenka noocaas ah sababtu waxa ay dooniba ha noqotee, dhinacayaga intii aan is laheyn waajibku wuu idinkaga dhacayaana waan ka dadaalnay inaan wanaajinno xidhiidhka walaalahayo, waxaanse ka xunnahay in xidhiidhka maanta naga dhexeeya uusan aheyn kii la rabay inuu ka dhexeeyo dad wadaaga diin, dal, iyo dadba, dhinacayagana gari labo nin kama wada qoslisee waxaan eedda  saareynaa hoggaanka ururka ONLF waliba dhinaca uu hoggaamiyo admiraal maxamad cumar cismaan.

Su,aasha ku saabsan in aan arrintan ku wargalinnay madaxda ururka ONLF jawaabteedu waa maya maxaa yeelay sida aan horay u soo sheegay nagama dhexeynin xidhiidh heerkaas gaadhsiisan, waxaanse haddadan muujinayaa inaan dhinacayaga diyaar u nahay in aan ajandahayaga mideyno col iyo nabad kaan qaadaneynoba, hadda waxa aan galnayna waa xabbad joojin uun waana la hubaa haddaan taladayada mideynno ama isu soo dhoweynno in qiimaha iyo waxa aan heli karnaba ka badnaanayaan inta midkayaba gaar ahaan  u heli karo, culimada,aqoonyahanka,iyo waxgaradka reersoomaali galbeedna waxaan ka codsanayaa inay arrintaas dadaal ku bixiyaan annaguna kama weynin wax dadkayagu ku taliyo.

Marka aan sidaas leeyahayna waxaan ogahay in ururka ONLF laftiisu kulammo gaar ah oo ugu yaraan saddex kulan gaadhaya la qaatay itoobiya.

 somalimiror: sheekh ibraahim aad baad ugu mahadsantahay sida aad uga jawaabtay su’aalahayagii

sh.: idinkaa mudan aad baana idiin soo dhoweynayaa mar walba iyo meel walba

Somalimirror :- Assalaamu Calaykum Waraxmatuhlaahi Wabarkaatuh  ku soo dhawowo Somalimirror.

C/raxmaan Maxamed C/laahi  :- Wacalaykumu Salaam Waraxmatulaahi Wa barakaatuh Alxamdulilaahi Rabil caalamiin thuma Salaatu wa Salaamu calaa ashrafil Anbiyaa’i Wal Mursaliin Sayidinaa Muxamadin wa Calaa Ahli wa Wa saxbihii Ajamaciin , ahlan waan dhawahay.

Somalimirror:- waxaad ka warantaa Warashada Kaluunka ee Laas qoray sidii aad ku aas aasteen iyo sidii aad ku bilowdeen?

C/raxmaan Maxamed C/laahi :-Bismilaah Warshadda Kaluunka Laasqoray waxaa la aas aasay labadii kun (2000) waxaana aas aasay dhalinyaro ganacsato ah oo dalka dibadiisa ku nooleyd xiligaa oo ay u suura gashay in ay soo saaran wax soo saar runtii ay gaadhsiiyeen daafa caalamka oo dhan arintaas oo u ahayd dhiiri galin iyo faan Umadda Soomaaliyeed kuligeedba .

Somalimirror :-Maxay tahay Asbaabta ama ujeedooyinka keenay in la Aas aaso Warashadda?

C/raxmaan Maxamed :- sidaan ogsoonahay Soomaaliya waxa ay ku jirtaa ama ay tahay dalka ugu xeeb dheer Afrika sidaas darteed kheyraadka badda oo aan tira koob lahayd ka faa’iideysigiisu wuxuu soo galayaa waxyaabaha Owlawiyaadka ah oo dhaqaalaha dalka lagu kabi karo ,runtii Warshadda Kaluunka Laasqoray waxa ay ku taalaa meel loo asteeyay oo caan ku ah helitaanka Kaluunka ,waliba leh dabaa’ic gaar ah oo dadka badda yaqaanaa ay yaqaanaan oo kaluunku ka helo cuntadiisa waxaana Warshadan ka horeeyay Warshad ay dhistay Dowladii dhexe ee burburtay oo ay gacan ka siin jireen Talyaaniga(Italy) iyo Ruuska(Rusia) oo u kala dambeeyay , marka goobta warashada la dhigay waxa ay ahayd meel u astaysan in looga faa’iidaysan karo kheyraadka , tan labaad Mujtamaca Soomaaliyeed wakhti uu burbur ku jiray ayay ahayd waxa ugu muhiimsanaa oo ay dhalinyaradaa ganacsatada ah ku fakarayeen waxa ay ahayd ka sokow in ay iyagu dhaqaalo ka tacbaan iyo faa’iido waxa uga muhiimsanaa in ay shaqo ugu abuuraan dad tiro badan oo Soomaali ahaa oo danyar ahaa oo runtii u noqoneysay meel ay noloshooda ka dabaraaan wa ficlan arintaana way dhacday marka ay Warshadu istaadheydna(shaqeynaysay) waxaa gudaheeda ka howl galayay dad tiro badan oo nin waliba ku sii xidhan yahay qoys ama qaraabo iyaguna tiro ahaan aan ka yareyn shan qo,f cel celiska dadka sida tooska ah iyo sida aan tooska ahayn ugu tiirsan waxaa lagu qiyaasi karaa in au kor u dhaafayaan shan kun oo qof.

Somalimirror:-taas waynu u soo laaban doonaa shaqada iyo howshooda lakin aynu galo qaabka aad wax u soo saartaan muxuu yahay ?

C/raxmaan Maxamed C/laahi  :- Warashada Kaluunka Laasqoray runtii waxay soo saartaa ilaa hadda kaluumo gasacadeysan nooca loo yaqaano Tuunada oo labo nooc ah oo labo Saays(size) ah oo la yidhaahdo  tuu wan wan (211) iyo Tirii siro saban(307) oo garaamka ku jiraa kala badan yahay oo xajmigooduna kala weyn yahay,waxaa kaloo sanadkii dhawaa ku guuleysanay in aan soo saaro kaluun la yidhaahdo Marakel (Mackerel)iyo Saradin(Sardine) oo runtii caalamka aad looga yaqaano kaluunkaas oo tayo ahaan ka tayo fiicanTuunada, lakin aqoonta ay dadkeena Soomaaliyeed ay u leeyihiin ay koobneyd, suuq geyn fiican oo aan u sameynay iyo dadkii oo bartay darteed hadda kaluunkaa Saradinka iyo Makarel-ku suuqiisu aadbuu u fican yahay , waxaa kaloo oo aanu soo saaray si tijaabo ah kaluumo aanu qalajinay oo bacaysan oo garaamkoodu labo boqol (200Gm) oo garam yahay isaguna wuxuu ahaa tijaabo kaliya sanadkan ayaan ku tala galay inaan si dhameystir ah u soo saaro ,Kaluunkaas bacaysan ilaa sadex nooc ayuu noqon doonaa runtiina waxa uu noqon doonaa kaluun kaafiya dadka tabarta daran ama dhaqaalohoodu liito kaluun ay iibsan karaan oo ay ka heli karaan wixii kaluun laga heli jiray lacag jabana ay ku helaan, markaa waxaa kaloo ay warashadu soo saartaa oo ay ka gacansataa kaluumada aan Tuunada ahayn oo ay ka mid yihiin Kaluun cadka sida Taraaqadda kaluumada la midka ah ee kaluun cadka la yidhaahdo ayadana noocyo kala duduwan ayaa loogu suuq geeyaa caalamka, waxaa kaloo warashadu ka gacansataa oo ayna si dhameystir ah wali u soo saarin oo ay heer beremetif ah ku soo saartay Cunada la yidhaado Fiish Meel-ka ,waxaa la yidhaahdaa qashinka ka soo hadha kaluunka boroseeska la mariyo asagana caalamka ayaa loo suuq geeyaa sida khaasatan Jayna(China ) aya qaata ,waxaa kaloo munaasabada aan ku xusi lahaa wax aan anagu warshad ahaan kheyraadka badda uga faa’iidaysanay ma ka noqon karaan badda waxa ku jira kama noqon karaan 50 % wajiyada aan anagu hadda wax ku soo saaro iyo kheyraadka badda ku jira waxaad moodaa in ka badan 80% in ay inaka maqan tahay.

Somalimirror :- waxaad tilmaantay in Kuluun cadka aad u suuq geysaan wadamada dibada ah wadamadaas wax ma nooga tilmaami kartaa?

C/raxmaan Maxamed C/laahi  :- koley anigu intaan shaqada hayay waxaa ugu fogeyd meeshaan wax u suuq gaynay Yaman lakin wakhtiyadii aniga iga horeeyay kaluunkaan waxaa la gaadhsiin jiray Imaaraadka Carabta sidoo kale Bariga Afrika waa loo iib geyn jiray markaa kaluunkaan gasacadeysan Soomaali meel ay joogto oo aanu gaadhin ma, jiro inta badan Ilaa Owsatareeliya (Australia) waa gaadhay wayna arkeen ayaan filayaa .

Somalimirror :- qaabka aad wax u suuq geysaan waa side ?

C/raxmaan Maxamed C/laahi  :- runtii suuq geyntayadu waxaa la yidhi ninba ceesantii ceel keen lakin kaluunka aan hadda soo saaro Tayo ahaan waa kaluun ka tayo badan kaluumada kale ee aan fareeshka lagu qaban anagu maadaama awoodayadu xadidneyd kaluunkanu helaa wakhtigaanu helaa ayunbaan sameynaa sidaa ayuu fareesh ku noqdaa, waxaa kale oo uu heystaa sumcad sare oo dadka muwaadiniinta ah ee Soomaalida ahi meesha ay isaga ku arkaan ayna mid kale ku gadan runtiina aadbaan arintaa ugu mahadcelineynaa mujamaca(Bulshada) Soomaaliyeed oo muwaadiniinta ah , waxaa xusid mudan waxyaabahaan baraarujin lahaa waxaa ka mid ah waxaa dhici kartaa mararka qaar in kaluunka aan soo saaray in uu wax uu dheeraado kaluunka kale oo Taylaan (Thailand ) laga keenay marka su’aasho waxa ay tahay Kaluunka Taylaan laga keenay kartoonka ninka dalka keenay waxaa laga yaabaa dilalad hal doolar ama labo doolar ah in ay ugu jirto lakin lacagta inta kale marka laga soo qaado in uu afartan(40 Dollar) ama afaran iyo labo dadka ka siiyo laga soo qaado,waxaa laga yaabaa labada Doolar kaliya in ay isaga galayso afartanka doolar ee kale waxa ay dib ugu noqdaan Dalka dibadiisa, meesha anaga shilinka ugu horeeya ilaa kan ugu dambeeya uu galayo dad Soomaaliyeed siyaabo kala duwan ha u galee , mid badda kaluun ka soo qabtay , mid Shidaal keenay , mid ka shaqeeyay , mid dilaalay oo dib u gaday ,mid gaadhi saaray ,arintaas waxaan aad u baraarujinayaa hadii doolar ama labo ay dheeraato inaan la odhan il ribix arkaysaa rixin ma daydo lakin loo fahmo waxaa kaloo iyadna xusid mudan kaluunka dalka la keeno waa kaluunka laga tuugeystay ama boobka lagaga dhacay Dalkeena Maraakiibaa lagu boobay waa la soo warshadeeyay dibaa naloogu keenay, waxaa nasiib daro ah in aan inagu ka qeyb qaadano dhiiri galintiisa suuq u sii sameyno oo ayno Market(suuq) u noqono wixii la inaga xaday laftiisii ,markaa suuq geyntayadu way fiican tahay sumcadaasna wuu heystaa Ajansiyaal (wakiilo ) ayaa noogu kala filiqsan Soomaaliya daafaheedana waa joogaan Muqdisho Ajansi ayaa noo jooga Hargeysana Ajansi ayaa noo jooga Boosaasana Ajansi ayaa noo jooga ajansiyadaas wadanka gudihiisa ayay ka shaqeeyaan,waxaan hadda rabnaa in aan sameyno dalka dibadiisa Ajansiyaashii ahaa Insha’allahu Tacaalaa .

Somalimirror :- Kaluunka ay Warshadiinu soo saarto waxaa si sahlan loogu arkaa Wadamada dariska ah sida Kenya Itoobiya iyo Jabuuti qaabkee ayaad dhihi kartaa wuu ku gaadhay Wadamadaas ?

C/raxmaan Maxamed C/laahi :- waaba dhow yihiin Itoobiya, Jabuuuti iyo Kenya Kaluunkeena waxaa lagu arkaa dabcan dadka hadda maqaalkan akhrin doona (waraysiga) ay arki karaan Ostareeliyo(Australia) ayaa laga cunaa waana arin aan uga mahad celineyno muwaadiniinta Soomaaliyeed oo aad u jecel arintaa in ay wax soo saarkooda gudbiyaan.

Somalimirror :- warshadu waxa ay shaqeynaysaa ku dhawaad sagaal sano waxaana jirtay in ay Warashdu shaqo joojin ama caqabado la soo darteen caqabadahaas sideebaad uga gudubteen,maxaadse ku xaliseen?

C/raxmaan Maxamed C/laahi :- waad mahadsan tahay runtii jawaabtaas dadku way u baahan yihiin in ay fahmaan , shirkaddu waxa ay ahayd shirkad ganacsato ah Ibni aadankana waxaa weeye is fahanka iyo is qabadka iyo is fahan la’aantu waa wax ka suurtooba marka runtii walaalihii Warshadda hore u aas aasay oo abaal badan dabcan anigu aan u hayo umadda Soomaaliyeedna abaal badan ku leh waxaa soo dhex galay wax uun is faham waa ah , kadibna waxa ay door bideen in ay mulkiga Warshadda iska wareejiyaan oo ay ganacsato kale oo muwaadiniin ah ku wareejiyaan marka Sanadki 2007 ayay gacansato kale oo Soomaali ah oo muwaadiniin ah lagu wareejiyay warshadda oo laga gaday,waa dhici kartaa hantiilayaashii markii hore Warshadda maamulkeeda gacanta ku hayay dhaqaalahoodii in wax kaga hadhsan yahiin oo uu u shaqeeyo laakiin maamulkii iyo lahaanshihii warashadda way iska wareejiyeen arintaa waxay ku xalismatay sidaa ,haatana Warshadu hormar fiican ayay gaadhay oo intii hadda wakhtigaa ka dambeysay waxaa la laba jibaaray wax soo saarkeeda meeshii ay Labaantan tan ka ahana jirtay waxaa laga dhigay afartan tan in ay maalintii ka shaqeyn karto , waxyaabaha kale ee xusidda mudan waxaa ka mid ah warhshadu waxaa la odhan karaa Warshadaha Soomaaliya yaala waxay soo gali kartaa warshadaha ugu waa wayn hadayban noqon tan ugu weyn saas darteed dhaqaalaha ama hantida ay u baahantahay in lagu maal galiyaa waxaan dhihi karaa 20 % wali laguma maal galin waayo waxa ay ku wajahan tahay oo ah khayraadka dalka oo aad u balaadhan ayay iyadu inta ay haatan ka isticmaashaa (warshadu) xadidan tahay marka hadii dhaqaalo badan la galiyo waxaa la isticmaali karaa ri soorsiga dalkeena yaala ee la boobayo ayaa si balaadhan looga faa’iidaysan karaa ,arintaa oo wax badan ka tari karta daganaanshaha dalka iyo dhaqaalihiisa labadaba intaas laftigeedu in niyadda lagu hayo weeye walow aan dareemayo dabeecadda dadka Soomaalida ah ee gacansatada ah ama gadisleyda ah nooca ganacsiga ay barteen waxa uu yahay nooca gadiska oo lacagta dhow ah oo inta shey la gato dibna loo sii gado lacag laga sameeeyo si fudud oo aanay u tababeyn in la maal gashado mu’asasaad sidan oo kale ah oo lacagtu kaa raagi karto oo faa’iido dhow aanu kuu sameyn karin arintaa aad uguma dhiiradaan waxaana laga yaabaa in ay fududahay in ay yidhaahdaan ninkii boqol ama labo boqol oo kun (Dollar )ay kaga jirto inuu yidhaahdo labadaa boqol ha igaga jirto wax dambana tabar uma hayo oo mashrucaa balaadhitiisa oomateed badan aanu u helin arintaana waa mid laga bixi doono oo Insha’allahu mustaqbalka dhow jareynayno in natiijooyin fiic fiican laga sameeyo dadka aragtidooda iyo caqliyadooda laga sameeyo oo waasac ay noqdaan .

Somalimirror:- waxa ma nooga sheegi kartaa faa’iidooyinkii ay shirkaddu gaadhay sanadihii u dambeeyay ama ka maamul ahaan intii wax laga badalay?

C/raxmaan Maxamed C/laahi :- aadbaan ugu faraxsanahay inaad su’aashaa I waydiisoo aniguna shakhsiyan waxaan ahay dadka markii hore xisaabaadka ka shaqeyn jiray waxaana u malaynayaa hadii aan dadka xoga faa’iidada iyo khasaaraha loo soo gudbin kalsoonidu inay lumeyso anigu hadda hal sano ayaan maamulka shirkadda gacanta ku hayay ,sanadkaa oo aan ku jiray xili diyaarin iyo isku dubarid waxaan odhan karaa xili shaqeedkaas waxaanu shaqeynay konton iyo labo maalmood iyadoo warshaddu noo fureyd todobo bilood saas oo ay ku tahay waxaanu nimi birifikal booynti waxa la yidhaahdo oo khasaare iyo faa’iido midna aanan sameyn oo aanu badbaadnay arintaas runtii waxay dhiiri galin u tahay dadka mashruucan daneynaya , ha noqdaan kuwa maal gashaday ama ha noqdaan kuwo rajada ka qaba oo yacni ku yididooloonaya in ay mashruucan horu koco waxaana muuqaneysa in mashruucan uu yahay mid is wadi karaya hadii caqabadaha aan haddda xuseynay oo ay ka mid tahay kaluunka helitaankiisa iyo waxyaabaha ku xidhnaan kara mashruucan inuu yahay mashruuc aad iyo aad isu wadi karaya dadka maal gashadayna Inshaa’allahu Tacaalaa ay wax ka heli karaan ,Ummadda ku nool uu nolosha ka sameynaysaana ay nolol ka heli karaan marka sanadkayagii hore saas ayuu ahaa , sanadkana waxaanu rajeynaynaa Inshaa’alaahu Tacaalaa in faa’iido ay ku farxaan dadkii maal gashaday oo aduunka daafihiisa kala jooga in aan xajiiqino Ilaahay idankii .

Somalimirror :- aynu u laabano dhanka Shaqaalaha oo aad si fudud wax uga tilmaantay ,bal shaqaalaha habka ay u qeybsan yihiin iyo wixii Soomaali ah iyo wixii Ajinabi ah wax nooga sheeg ?

C/raxmaan Maxamed C/laahi  :- su’aal fiiican weeye hadda dadka warshadda ku howlan oo shaqadeeda gacanta ku haya waxay u badan yihiin dad Soomaali ah marka laga reebo tiro kooban oo dad ah oo farsamo yaqaano ah oo ka kala yimaada wadamada Taylaan (Thailand ) iyo Sirilaanka (Sri lanka)iyo Keenya(Kenya) dadkaas waxay hayaan shaqooyinka farsamada ah oo waa weyn lakin tirada badan ee warshadda ka howl gashaa waa dad Soomaali ah dhamaan waaxyaheedana iyagaa gacanta ku haya ,waaxyaha ay warashadu ka kooban tahayna waxay la mid tahay waaxyaha ay warshad ka koobnaan karto, Waaxda Farsamada, Waaxda wax soo sarka , Waaxda Shaqada iyo Shaqaalaha , Waaxda Xisaabaadka iyo maamulka iyo faraca badda oo ay gaar kala noqon karto warshadaha kale , dhamaan dadkaas badidood waa Soomaali marka laga reebo tiradaa yar , tiro ahaan waxay isla badashaa tirada shaqaalaha warshadda ka howl gala xajmiga Kaluunka shaqadiisa gacanta lagu hayo waxaa dhici karta in shaqada gudaha Shaqaalaha gali kara ay kor u dhaafto ilaa sideed boqol oo qof iyada oo inta badda ku howlan oo gaadiid kaga shaqeysanaya ay dhacdo , Rikoodhkii ugu dambeeyay sanadkii dhawaa 85 gaadiid ah ayaa badda ku howlanaa oo ugu yaraan kiiba ay saaran tahay 3 qof ayaa ku howlanaa ,tiradaa dadka ah waa kuwa aan dhihi karto toos ayay warshadda ugu xidhan yihiin ,waxaa kaloo shaqo ka abuuran kara intaa intii Fisilatiga u sameynaysay Muqaaxi ha furaan ama adeeg ha u fidiyaan ama gaadiid ha ka kiraystaan ama gaadiidkooda wixii ay ku shaqeysan lahaayeen ha keenaan dhammaan dadkaas oo dhan waa dad aan dhihi karo waxay toos ugu xidhan yihiin shaqada warshadda , marka shaqaale fara badan ayaa ka howl gala Warshadda oo gaadhi karaya tirada intaa la eg.

Somalimirror :- wax tababaro ah oo aad siisan Shaqaalaha ma jiraan ?

C/raxmaan Maxamed C/laahi :- nimanka farsamo yaqaanada ee Ajinabiga ah waxa kaliya ee dalka ay u joogaan waa in ay tababaro siiyaan farsamo yaqaanada Soomaalida iyagaana gacanta ku haya ,waxanaa ay siiyaan tababaradu way kala duwan yihiin waxay siiyaan nooca ugu fiican oo la yidhaahdo (Job training ) shaqada gudaheeda ayayna tababarka ku siiyaan waxaana rajeynaynaa Insha’allahu Tacaalaa inaan mudo dhow ka maarano dadka Ajinabiga ah wax uun istishaarad ah mooyaane  inaanu ka maarano ayaan rajeynayaa .

Somalimirror :- aynu u laabano caqabadaha xagga dibada idinka soo food saara ama xagga kaluumeysiga, caqabada mudooyinkan dambe ka jira xagga badda budhcad badeeda iyo Quwadaha shisheeye ?

C/raxmaan Maxamed C/laahi  :- Su’aal aad u muhiim ah weeye caqabada waan kala qaad qaadi karaa , caqabado waxaan kala simanahay masaanicda ama warshadaha dalka gudihisa la keenay waa caqabad infestimenti oo xidhiidh la leh arintii aan hadda sharaxayay oo ah caqliyada dadka Soomaalida ah oo wax maal gashadaa in ay aad u kooban tahay runtiina aanay ku tababareyn in ay mashaariicda wakhti dheer wax laga sugayo ay sugaan taasi waa caqabad, lakin waxaa iyadana caqabad ah badaan aan anagu hadda kheyraadkeeda aan isticmaalo oo aan warshadeyno col badan baa ku jira oo waliba u badan nimanka kaluunka dalka ugu boobaya sida aan sharciga ahayn nimankaasi runtii caqabad xoog ah ayay nagu hayaan waxayna kaliftaa in anagoo diyaar ah oo wax soo saarka dhinacyadiisii oo dhan u diyaar garownay in aan weyno kaluunkii iyadana ay sabab ka tahay boobka ay ku yahaan nimankaa budhcadda bada boobeysa ah ee Ajinabiga ah oo waliba gaadiidka xooga weheshanaya isticmaalaya taasi waa caqabad aan la inkiri karin , iyadana waxaan iyana la diidi karin dhibaatada ay budhcadu lafteedu sameyneyso iyada oo lumisa in si xoriyad ah gaadiidkii warashada oo si xor ah wax u soo qaadaya aysan mararka qaar suura gal ahayn in ay meesha yimaadaan oo ay kaluun keenan iyadana caqabadaha ayay ka mid tahay , waxaa kaloo budhcadu ay sahashay niman dhalinyaro ah oo shaqeysan kari lahaa oo xoogooda maali lahaa in ay lacagtan dhow arkeen oo ay markaa u soo rogan waayeen shaqadan adag oo Warshada dhexdeeda ka socota ama kaluunka raadintiisa shaqo ka dhigtaan oo si sahlan oo markaa lacagtan dhow ee budhcadda laga helayo ugu luga duwdaan iyadana caqabad la xusi karo weeye, caqabadaha waxaa ka mid ah dalka aan inaga warshada ka sameynay dal burbursan weeye dhinacyo badan , dhiniciisa hormarineed bukuug (bangiyo ) ma leh , ma laha goobo waa weyn oo qalab warshadeed lagu gado markaa waxaa dhinaca Loojistikada marar badan kugu imanaya in dalka dibadiisa mar walba aad uga baahato wixii kugu yimaado oo cilad ah oo qalabka aan ku shaqeyneyno ah waxaa dhici karta in ay baahi dibadeed noo qabato ,waxaa kaloon iyadana ka yareyn oo caqabadaha ka mid kaluumeysatada Soomaaliyeed ma ahan kaluumaysato leh xirfad kaluumaysi waa dad dani badda galisay oo aan lahayn xirfad kaluumaysi , sidoo kale ma haystaan qalab kaluumaysi oo casriyaysan waxaa laga yaabaa lixdan sano ka hor sidii loo kaluumaysan jiray in ay u kaluumaysanayaan taasina waxa ay sababtaa in ay sahlanaan waydo in ay kaluun helaan kadibna waa niyad jabaan sidaas ayayna badda uga baxaan iyadana caqabadaha la xusi karo ayay ka mid tahay , arimahaas oo dhan waa arimo la dhihi karayo waxa ay noqon karaan caqabad , haba ugu daraato mida khuseysa tuugada badda ku jirta ee guraneysa kheyraadkii badda ee aan anagu isticmaali lahayn.

Somalimirror :- waad mahadsan tahay kaasi waxa uu aha Maamulaha Warshadda Kaluunka Laasqoray C/raxmaan Maxamed Axmed

C/raxmaan Maxamed Axmed :- idinkaa mudan Wa salaamu Calaykum waraxmatulaahi wa barkaatuh

Shabakadda Warbaahinta Somalimirror waxay idiin soo gudbinaysaa Waraysi aanu la yeelanay Sheekh Xasan Daahir Aweys oo ay Saaxiibo ahaayeen Sheekh C/Qaadir Maxamed C/llaahi Garre oo ay 1973 isla soo Bilaabeen Dacwada Maanta si wacan ugu Baahday Soomaaliya Afarteeda jiho.

Waraysigana wuxuu u dhacay sida tan:-

Somalimirror: – Assalaamu Calaykum Waraxmatullaahi Wabarakaatuhu, Wajazaakallaahu Kheyran.

Sheekh Xasan Daahir Aweys:- Wacalaykumusalaam Waraxmatullaahi wabarakaatuu.

Somalimirror:- Sheekh Xasan, Maxaad ka Xasuusataa Taariikhdii Sheekh, Dr. C/qaadir Maxamed Cabdullaahi Garre?.

Sh. Xasan Daahir:- Bismilaahi Raxmaani Raxiim, horta ilaahay SW waxaan ka rajeynaynaa C/qaadir Maxamed Cabdullaahi oo ku geeriyooday Magaaladda Djibouti sida la sheegay ayaan marka hore waxaan leenahay Umaddii uu ka tagay iyo Dadkiisii iyo Qaraabadiisii iyo Asxaabtiisii ayaan u tacsiyaynayaa, ilaahayna waxaan uga baryaynaa inuu Dabigiisa Dhaafo janadiisana uu Fardowso ka raadiyo, Midda labaadna koleey wuxuu ahaa Nin aan Dacwadii isla soo Bilownay ayuu ku jiray, Jamaacaadkii Islaamiga raggii wax ka Aas-Aasay ayuu ahaa, ka dibna Dacwada Meel Wayn uga jiray, allaha Barakeeyo, ka dibna raggii Sucuudiga u tagay inay wax ka bartaan oo Dacwada ku soo bartaan ayuu ahaa, illaa uu Dr(PHD) ka gaaro ka dibna Jaamacadda Boosaaso ku taala Raggii Aas Aasay oo howl-galiyay ayuu uu ka mid ahaa, Runtii Nin Edeb wanaagsan, Diin wanaagsan iyo Cilmi Wanaagsan aan ku naqaano ayuu ahaa, Runtii Taariikhda Xarakaatka Islaamiga ah khaasatan Itixaadkii, Jamaaca Al-islaamiya iyo Ictisaamkii kuli raggii Mu’asisiinta ee Mar walba Hormuudka ahaa ayuu ku jiray, ilaahay SW ayaan u barinaynaa in wixii Kheyr ahaa ee uu soo qabtay inuu Ajar ka siiyo, wixii Danbi ahna ilaahay uu u dhaafo, Umadana Samir ha ka siiyo Badal Kheyr qaba ha ka siiyo.

Somalimirror:- Goorma ayaad isla Bilowdeen Sheekh Dr. C/qaadir Maxamed Cabdullaahi Garre Dacwada Islaamiga ee Soomaaliya?

Sh. Xasan Daahir:- Dacwada Sideeda waxaa lagu Bilaabaa Rag yar, 1973 raggii Jamaacaddii Ehelka soo bilaabay buu ka mid ahaa, Rag yar bay sida Badanba ku Bilaabataa, Sheekh Maxamed Macallin Alaha ha u naxariistee raggii kitaabkii u akhrin jiray ka Asaasmay aan wada ahayn intaasna Dacwada ayuu ku soo dhex jiray sidaas ayuuna wuxuu ku tari karay ku daray, wixii khalad ahna ee uu ka Celin karayna uu ka celinayay, Marar Badan oo ay Bidco nagu furmeen sidii Takfiirkii oo kale Waxyaabaha noocaas oo kale ah raggii aadka iyo aadka isku hortaagay ayaan ka wada mid ahayn, Shuuciyadii iyo Balaayadii Waagii Wadaada la dilay iyo wixii ka danbeeyay raggii aadka iyo aadka is hor taagay ayaan ka wada mid ahayn, waxyaabihii intaas ka danbeeyayna sidii Caqiidada Dadka loogu sixi lahaa Dowlad Islaamna loogu soo celin lahaa wadanka Insha allaahu Tacaalaa ayaan ka wada mid ahayn, Nin walbana intii uu ka geysan karay ilaahay ajar ha ka siiyo Insha Allaah Tacaallaa inta ka danbeysana ilaahay Ma fidneeyo Insha Allaahu Tacaalaa.

Somalimirror: – Ma jirtaa Dhibaatooyin idinka soo gaaray Dacwada intii aad wadeen ?

Sh. Xasan Daahir:- Badanaaba Dadku marka ay yaryihiin, hadana Dowlad Jaa’ir ah ama Dadkii Gaalnimo ku Hogaaminayso oo Shuuciyo iyo Balaayo marka lagu dhex jiro waxyaalaha aadka iyo aadka Cajaaibta u leh waxaa ka mid ah markii ay yiraahdeen Shuuciyo ayaan Qaadanay oo Dhaxalkii ku tunteen oo Dowladaha Qaar sida Masar oo kale oo xataa iyaga laftooda Shuuciyo Qaatay ay ixtiraami jireen oo Aayaadkii Qur’aanka oo Calam Islaami oo dhan laga Ixtiraami jiray ay nasakheen, runtii raggii aad iyo aadka u hor istaagay oo markaas wadaadii Tobanka ahaa lagu dilay oo raggii Sheekh Maxamed Macallin ee Dacwadda waday la xidh-xidhay oo raggii kale ee Wasaarada joogay ee Sheekh C/Qani oo isna Ayaan dhaweyd Dhintay la xidhay, ragas oo dhan ee Dacwadii la kala eryay oo raggii Mas’uuliyiinta ahaa ee Islaamka u Boodayay oo dhan la kala eryay Qaarna la xidh- xidhay, runtii Raggii is hortaagay baan ka wada jirnay, Tusaale, waxaa jirtay in la yiri 5 Qof meel iskuguma Imaan karto, markaasaa waxaan Sameyn jirnay 4 Qof baan Meel iskugu imaanaynaa Guri oo kale, si aan Danbigiina uga fakano, waxayagiina noogu hirgalaan, hal qof ayaan ka tagaynaa, Qofkaas ayaa loo Akhrinayaa Kitaab, 4-taas Qof waxaa la rabaa 4 kale in Nin walba uu u akhriyo si aysan Dacwadii ku dhumin, arimahaas raggii aan isla soo marnay ayay mid ahayd, markii danbe Raggii Banaanka u baxay oo Banaanka intaan u saarnay niri wax ha soo barteen oo Dacwadii wax ha u soo barteen buu ku jiray, Ciddii ugu horeysay ee Jaamacadaas la yiraahdo Umu Quraa galay buu ku jiray markaa ka dibna Wadankii marna ku soo noqonayay marna Tacliintooda ku noqonayay ayuu ka mid ahaa, waxyaalahaas oo dhan ragii ku soo wada jiray baan ahayn.

Dowladii Shuuciga ahayd waxay sameysteen Qaanuun la yiraahdo “54” “Ka faa’iidaysi Urur Diimeed Waa Dil” Saas ayay ahayd Ragayagii waxa lagu xukumay ee 9 ka ahaa, laakiin aan ilaahay u qorin in la laayo, laakiin isagu wuxuu ka mid ahaa raggii Tacliinta ku Maqnaa oo laakiin Dacwada halkaa ka waday oo halkaas aad iyo aad uga Taageeri jiray.

Somalimirror: – Geerida ku timid Sh. C/qadir Garre Saameyn intee la eg ayaad is leedahay wuu ku yeelan karaa Saxwadii Islaamiga ahayd ee aad isla soo Bilowdeen?.

Sh. Xasan Daahir:-  Runtii Gidaar weyn baa Dacwada ka dumay, laakiin Dabeecadda Ilaahay waxaa ka mid ah in Haddii Nin tago inuu nin yimaado oo ilaahay baa keensada, Qofkii dhintana Qof baa badalaya, Qofkii isagu hadda isagu ka tago oo Dacwada isaga taga Dad baa Badalaya isaga ka badan, marka Insha allaahu waxaan Rajeynaynaa Umuurtiisa ha ahaato ama Muslimiinta kale ha ahaato maanta Dacwada Meel aad iyo aad u Cajiib badan bay maraysaa oo Nasrigii ay rabeen ay ku dhawdahay, Dacwadii Towxiidka iyo Sunadda oon faafin jirnayna ay hadda Qaali ku tahay Soomaaliya Al-Xamdulilaah xataa dadkii Reer Baadiyaha ahaa ay qaali ku tahay waa Ilaahay Mahadii, Nasrigii Weynaa ee aan Dhowraynayna waa Dhadhaw yahay insha allaah, Rag gaarsiiyana waa la helayaa Insha Allaahu Tacalaa, Marka Badiil Kheyr qaba ilaahay ha na siiyo, isagana Ajarkiisa alaha ha weyneeyo.

Somalimirror: – Sheekh Xasan Maxaad ka xasuusataa Dabeecadihii uu Sheekh C/qaadir lahaa intii aad tiqiinay?

Sh. Xasan Daahir:- aad iyo aad Dadka aan la heli Karin buu ahaa oo Dabcigiisa aan la heli Karin oo Dad wadkana ku fiican, Diintana ku fiican, iyo Fahamkeeda, ra’yigana ku fiican, in badan buu Mas’uul nooga ahaa Dalalkaas Khaliijka oo dhan, ayuu Mas’uul inooga ahaa, Marka Dadka aadka Dad wadka u leh oo Dabciga Fiican oo xanaaqa yar oo mararka Qaarkood rayiga wanaagsan ku adag ayuu ahaa, runtii Dadka Naadirka ah ayuu ahaa, khaas ahaan Diinta Fahamkeeda iyo waliba Caqiidada Tasxiixinteeda dadka aadka iyo aadka ugu Xeelta dheer ayuu ahaa si fiicana u Yaqaano oo illaa DR. (PHD) ku qaatay.

Somalimirror: – Assalaamu Calaykum Waraxmatullaahi Wabarakaatuhu, Wajazaakallaahu Kheyran.

Sheekh Xasan Daahir Aweys:- Wacalaykumusalaam Waraxmatullaahi wabarakaatuu, Wajazaakumullaahi Kheyran. 

Shabakadda Warbaahinta Somalimirror waxay idiin soo Gudbinaysaa Waraysi ay ka Tarjuntay Wargeyska “Newyork Times” oo uu la yeeshay Sheekh Shariif Sheekh Axmed oo lagu weydiinayo Su’aalo dhinacyo badan Taabanaya.

Waraysigiina wuxuu u dhacay sida tan:-

Su’aal:- Aan ku bilowno cadawgaada. Waad garanaysaa nimankas waadna la soo shaqaysay sida Xassan Daahir Aweys iyo Abu-Mansuur, maxaad ula heshiin la’dahay maxayna kuugu adkatay in aad keento miiska wada hadalka?.

Shariif:- Waa run waana su’aal muhiim ah waxaan door bidaayay maadaama aan xilligii maxkamadaha soo wada shaqaynay aan haddana wada shaqayno.

 Dadku waxay maraan marxalado, mararka qaarna waxay u weecdaan jiho khaldan. Musoo biirid la’aanta hanaanka nabadda ayaa ka dhigay kuwo wadadii ka luntay haddana kama soo laaban karaan halka ay gaareen.

Su’aal:- Xoghayaha Arrimaha Dibadda Maraykanka Hillary Rodham Clinton waxay tiri waxaa muhiim ah in kooxahaad mucaaradka ah lagaaro lana soo xera galiyo. Maxaad arrintaas ka yeelaysaa?

Shariif:- arrintaas aad ayaan muddo ugu mashquulsanayn qaybtii ugu muhiimsanayd Xizbul Islam waxay ku soo biirtay Dowladda kuwo kalena waxay ka yimaadeen Al-Shabaab.

Su’aal:- Sidee suura gal u tahay isku dayga in aad wax ka dhaadhiciso?

Shariif:- waxaa jira dad ka tirsan dowladda oo xiriir la leh kooxahaas iyo dad kale oo soomalai ah, dowladda Albaabkeedu waa mid furan waxayna haystaan Khiyaar ah in ay dib u eegaan Mowqifkooda.

Su’aal:- Goormee kuugu danbaysay oo aad lahadasho Aweys?.

Shariif:- Ma Xasuusto, xilli hore ayay ahayd.

Su’aal:- Ma wici kartaa?

Shariif:- wax dhib ah iguma haso taasi, balse ma filayo in xilligan ay sax tahay iyo in wicitaan uu wax isbadal ah keenayo.

Su’aal:- Maxay tahay Riyadaada ku aadan in aad Nabad Keento? Bal tafaasiil kooban inaga sii?

Shariif:- Dowladdu waxay isku dayaysaa in ay wada hadal ku soo jiidato inta badan ururada, In ay kasbato Shacabka, taasina waxay naga caawinaysaa dhinacyo kala duwan, laakiin Xibul islaam & Ashabaab waxay hayaan wado mugdi ah.

Su’aal:- Maxay Dowladdu qabatay tan iyo markii ad Madaxweynaha noqotay bishii February?

Shariif:- Dowladdan waxaa soo wajahay caqabado aan horay loo arag. Waxaan la tacaalaynay Argagixisada Caalamiga ah ee goobo kale dhibaato ka abuuray.

Qorshahoodu wuxuu ahaa in ay ridaan dowladda isla markii ay timid. Dowladdu waxay sugtay jiritaankeeda. Waxa ay dowladdu doonayso waa u cadahay dadka soomaaliyeed iyo Beesha caalamka. Waxaan xoogga saaraynaa dhinaca amaanka, waxaan ka shaqaynaynaa dib u dhis, samafalka, Maamul wanaag dhamaanna arrimahaasu waxay u baahan yihiin dhaqaale.

Su’aal:- Haddii aadan helin kaalmda aad u baahan tahay maxaa dhici doona?

Shariif:- Wax badan ma samayn doono, wax sidaa ahna ma hirgelayaan.

Dowladdu waxay la tacaalaysaa umuuro badan. Waxaan isku dayaynaa in aan dejino Maamulka, waxaan isku dayaynaa in aan dib u qabsano qaybaha ay ka taliyaan Xagjirku, waxaan ka shaqaynaynaa dib u heshiisiinta, Dagaalku culays badan ayuu nagu hayaa.

Su’aal:- Soo dhaqsasho intee qaadanaysa ayaad rabtaan? Miyaysan Dowladdu sii jrayn haddii aysan helin Taageero badan?

Shariif :- dhibaatada gurmadka caalamiga ah leeyahay waxaa ka mid ah in uu soo daahid iyo yaraan. Shaki kuma jiro dowlad curdan ah oo aan helin dhaqaale ku filan in aysan taagnaanayn, marka Soomaaliya miyay ka badalan tahay?

Su’aal:- Maxay Ahlu Sunna Wal Jamaaca [ Suufiyada] ay ugu suura gashay in ay Al-Shaab jabiyaan adigana aad u awoodi weyday?

Shariif:- Farqi ayaa u dhexeeya magaalooyinka iyo gobollada. Maxkamaduha oo kaliyah ayay Muqdisho gacanta u gashay. Dabcan waxaa nalooga baahan yahay wax badan. Mucaaradku waxay aad ugu mashquul san yihiin weeraro ay dowladda ku hayaan Muqdisho gudaheeda, taas oo fududaynaysa in gobollada laga qabsado maadaama ay muqdisho xoogga saarayaan.

Su’aal:- Ma tihid nin milatery ah, taas oo dad badan ay kugu amaanayaan. Wakhti intee le’eg ayaad ku beerdaraysaa Arrimaha Milateryga?

Shariif:- inta badan wakhtigaana waxaan ku bixinaa arrimaha la xiriira Amniga.

Su’aal:- cel-celis ahaan intee wakhatgaada kamid ah?

Shariif:- 75% oo kamid ah wakhtigeena.

Su’aal:- ma heshay Istiraatiijiyad Milatry oo wanaagsan?

Shariif:- ma dhihi karo Sidaas?

Su’aal:- Ma ka walwalsan tahay soo xoogaysiga Ahlu Sunna?

Shariif:- Dariiqada Suufiyada caadi ahaan dagaal ma galaan, dhiigana ma daadiyaan, culumada Suufiyada ee hore waxay isku howli jireen Ruuxaaniga. Waxa aan ka cabsi qabo waa in ay qabatimaan wadada dagaalka, markaas way ka guuraysaa mabaadii’daas.

Su’aal:- Sidee yahay isku dhawaan shihiina. Mar aan tagay Dhusa mareeb iima muuqan wax xiriir ah oo ka dhexeeya dowladda iyo Ahlu-Sunna gabi ahaan?

Shariif:- Inta badan Soomaalidu waa Suufiyo. Ahlu Sunna gaar ahaan waxay ka gadoodeen gacanta Alshabaab, waxay xaq u leeyihiin in ay isdifaacaan, haddii ay ka baxaan booska isdifaaca markaas ayay su’aal ka imaanaysaa.

Su’aal:- Taas micnaheedu maxay tahay? Difaac way ka tageen waxay qabsanayaan dhul horleh.

Shariif:- Taas waxaan u aragnaa in ay isdifaaca ka mid tahay.

Su’aal:- bal ka hadalno Shareecada. Baarlamaanka wuxuu isku raacay in Shareecadu noqoto marjica dastuurka. Laakiin qaab noocee ah?

Shariif:- Shareecadu isma badasho. Waxa is badalaya waa dadka fulinaya. Waxa halkan xooga aan ku saarayno waa maxaa u roon dadka dantooduna ku jirtaa Aduun iyo Aakhiraba.

Su’aal:- fadlan haddii aad sii faah faahiso. Gabdhahu si wada jir ah wiilasha iskuulka ma ula aadayaan si isku mid ahna wax ma loo barayaa?

Shariif:- Taasi waa hal dhinac, wax dhib ah oo arrintaas ku saabsan kama jiraan Soomaaliya waxaa la helayaa dumar waayeel ah oo ka mas’uul ka ah Wax barashada.

Su’aal:- kawaran Xijaabka? Ma loo ogolaan doonaan gabdhaha soomaaliyeed in ay dariiqyada maraan ayaga oo aan Xijaabanyn.

Shariif:- Tafsiirka Xijaabku guud ahaan islaamku wuxuu farayaa dumarku in ay daboolaan jirkooda ujeedada laga leeyahayna waa in laga hortago fitnada IWM.

Su’aal:- laakiin mararka qaar soo lama rabo in la diyaariyo sharci? Turkiga lagama ogola in dumarku xirtaan Xijaabka, Sucuudiga waa laga ogolyaahay, dhankee soomaaliya geysaa marka la eego Xijaabka?

Shariif:- ujeedadu waa in la helo in dadku rabitaankooda ugu qancaan arrinta, waxaad tiraahdaa 80% oo Dadka kamid ah. Dowladdu waxay buuxinaysaa inta soo hartay. Dhaqanka nabigeena SCW ma ahayn in uu dadka awaamir siiyo asaga oo aan marka hore u diyaarin.

Su’aal:- laakiin Soomaaliya maanta arrintaas micnaheedu muxuu yahay? Dastuurku wa wuxuu dhihi doonaa Dumarku ha xirteen Xijaabaha mise maya?

Shariif:- Haddii aad eegto xaaladda Soomaaliya maanta arrintan waxay noqonaysaa mid laga muhiimsan yahay, marka la’eego dhibaatooyinka kale ee na horyaalla tan ma noqonayso arrin culays leh, waxaan ka shaqaynaynaa sidii aan u badbaadin lahayn nafta Dadka Soomaaliyeed taas oo aad uga muhiimsan arrintaan.

Su’aal:- Maxaad ka malaynaysaa Al-Qacida iyo lugta ay ku leedahay halkan?

Shariif:- waxaan aaminsan nahay in uu jiro xiriir adag oo ka dhexeeya Alqaacida iyo dad halkan jooga, dadka hogaaminaya Dagaalka. Xiriirka Alqaacida lala leeyahay waa mid la wada ogsoon yahay, Alqacida ayada ayaa sheegatay, dagaal yahanada maxaliga ahna way sheegteen. Haddii aad aado goobaha ay ka taliyaan mucaaradku waxaad arkaysaa dagaal yahano Ajnabi ah, calaamadahooda iyo Calamadooduna sidoo kale waa buux.

Su’aal:- Markii aad ka tirsanayd Maxkamadaha 2006-dii, ma arkaysay in arrintanu soo kobcayso?

Shariif:- waxaa jiray dad badan oo tahniyaynayay hididiilana muujinayay soomaaliya xilligii maxkamadaha islaamiga ah. Balse ma jirin wax la oran karo wuxuu ahaa bilowgii Al-Qacida iyo wax lamid ah wakhtigaas.

Su’aal:- laakiin taa ka gadaal Maraykanku wuxuu ku waydiisanayay nin aad ka caawiso soo gacan gelinta Fazul Cabdullah Mumaxed iyo dad kale oo looga shaki qabay in ay ku lug leeyihiin Argagixisada Al-Qacida. Ma Aadan samayn taas, waxayna sabab u noqoay in maraykanku Ethiopian-ka ku riixo in ay soomaaliya qabsadaan. Dib ma eegi kartaa oo ay kuu muuqan kartaa si aad ku baajin kartay in aysan dhicin taasi?

Shariif:- Maya ma jirin wax aan falno oo aan ku bajin karnay arrintaas.

Su’aal:- Sabab?

Shariif:- waxaa jiray Macluumaad kooban oo ku saabsan dadkaas. Waxaan u baahnayn wakhti?

Su’aal:- Muxuu yahay khaladkii ugu weynaa ee kaa dhaca madaxweyne ahaan?

Shariif:- hadda ayaan bilow nahay wax wakhti ah oo aan dib isugu eegno wali maanan gaarin.

Su’aal:- Haddii dib laguugu celiyo 2006-dii, ma jiraa wax aad si ka badalan sidii hore u samayn lahayd?

Shariif:- Waxaan hubaa in ay jiraan waxyaalo badan. Balse midda la rabo in aan tix gelino waxay tahay xaaladda xilligaas jirtay iyo waxa quman ee ay ahayd in lagu dhaqaaqo. Haddii arrintaas la gaaro iyo haddii kale waa su’aal kale.

Su’aal:- dadka qaar waxay moodaan in xoogga la saarayo dowlad hoos laga soo dhisay oo ahmiyaddeedu tahay maamulada maxaliga ah. Waxaan tagay dhawaan gobollada mana arkin wax muuqda oo tusinaya dowlad dhexe, maxaad ka leedahay arrintaas?

Shariif:- qorshaha dowladda waxaa qayb ka ah dhismaha maamulada gobollada.

Su’aal:- maxay tahay ulajeedada arrintaas? Iskuullada, cisbitaalada, iyo caawimaad milatery, Halkee ayaad ka bilaabaysaa?

Shariif:- dhismaha maamul buuxa.

Su’aal:- Halkee doonaysaa in aad ka bilowdo?.

Shariif:- Waxaan doonaynaa in aan is balaarino.

Su’aal:- Sidee kuula muuuqataa in aad sanadihii la soo dhaafay awoodda ka ahayd banaanka iyo hadda oo aad tahay Madaxweyne? Hadda xataa ma furtid albaabka gaarigaada, qof kale ayaa kuu qabanaya.

Shariif :- waxaa malaynayaa haddii aan albaabka furto iyo haddii cid kale ii furto wax sidaas ah ma keenayso. Waxa muhiimka ah waa in aan ballan qaadnay in aan dalka u shaqayno.

Su’aal:- Sidee kuula muuqataa in aad hadda la shaqaynayso Ameerikaanka oo Itoobiya ku caawiyay in ay kaa takhalusaan?

Shariif:- Su’aasha si kale ayaan u dhigayaa, waxa aan u dagaalamaynay waxay ahayd in aan helno soomaaliya oo nabad ah oo la jaanqaadi karta Caalamka intiisa kale.

Su’aal:- intee sano ayaad jirtaa?

Shariif:- waan hilmaamay cumrigayga intii aan ku lug lahaa dagaaladaan.

Su’aal:- Runtii

Shariif:- waxaan dhashay 1966

Su’aal:- intee caruur ah ayaad leedahay?

Shariif:- Koonfurta soomaaliya waxaa laga isticmaalaa haddii lagu waydiiyo caruurtaada waxaan dhahnaa “ waan wanaagsanahay”marka intaas waa kugu filan tahay ayaan filayaa.

Su’aal:- Ma waxaad jirtaa 42 mise 43 sano? Bishee dhalatay?

Shariif:- Su’aashan maxaa ku jira? Maxaa muhimad ah oo ay leedahay?

Su’aal:- Jariidadda aan u shaqeeyo, laguma qoro “1966” sanad ahaa waxaan ku qornaa Da’da Saxda ah sanad ahaan.

Shariif:- Haye waxaan dhashay Janaayo 1966-dii.

Taariikhda Gobolka

ugu horeyn Sheekh Ibraahim ayaa Qeexitaan kooban ka bixiyay Dhulka S/galbeed wuxuuna yiri“Hadaan u Qeexo qofkii aan aqoon Gobolka S/galbeed, waxa weeye 8 Milyan oo ka mid ah Muslimiinta oo ku nool Dhul dhan 650 kun oo laba jibaaran oo ku yaala Bariga Afrika, Inta ay Gumeysiga ku jirtana waa mid la mid ah inta ay Falastiiniyiintu ku jiraan Gumeysiga, laga soo bilaabo Sanadkii 1948 waxay ku hoos Noolyihiin Gumeysiga Itoobiya, illaa iyo maantana Hal Maalin isma dhiibin Shacabkaasi, Kacdoonka ka dhanka ah Gumeysiga itoobiyana wuxuu ahaa mid kolba dib u laba kacleeya”.

“Dhanka kale Dabar goonta Gumeysiga Itoobiya ee Birta ah wuxuu ka socdaa Gobolka Qarni iyo Dheeraad”.

Dhibaatada Gumeysigu ku hayo Shacabka S/galbeed

Gudoomiyaha U.W.S.L.F ayaa sidoo kale ka warbixiyay Dhibaatooyinka aan kala joogsiga lahayn ee ay Ciidamada Gumeysiga Itoobiya sida gaar ahi ugu hayaan Shacabka Soomaaliyeed ee Muslimka ah wuxuuna arintaasi ka yiri“Tira koobkii ugu danbeeyay ee ka warbixinaya Xaaladda Bani-aadamnimo ee S/galbeed waxay sheegayaan sidan soo socota:-

1- Gaajadda waxay gaartay 80% sida lagu sheegay warbixin ay Dhawaan soo saartay Q.M, taasna waxaa qeyb ka ah Hab Dhaqanka Gumeysiga oo Muwaadiniinta ka hor istaagaya inay wax Beertaan, iyo wax kasta oo ay Heli lahaayeenba oo agab ah

2- Dhanka Iclaamka, wax kasta oo ka socda Gobolka waa la caburiyay iclaam ahaan, Qofna ma garan karo wax halkaasi ka socda marka laga reebo Dadka ku dhex Nool mooyaane sida Muqaawamadda iyo Shacabka Dulman.

3- Waxaa kaloo ka jira Cunaqabatayn Dhaqaale, Dilal, Kufsi, Boob iyo Gubidda Tuulooyin dhan, Bishii ugu danbeysayna waxaa la gubay 15 Tuulo oo ku yaala Galbeedka S/Galbeed.

4- 42 Hay’adood oo Kheyri ah ayaa laga Cayriyay Gobolka oo dhan.

5- Waxay ka hor istaageen in Salaadii Jimcaha lagu Tukado Masaajida Caasimadda Gobolka ee Jig-jiga Isbuucii hore.

6- Maalintii fasaxa Jimcaha waxaa loo wareejiyay Maalmaha Sabtida iyo Axadda”.

“Dhamaan Dhibaatooyinkan waxay sii laba jibaarmeen ka dib markii ay Ciidamada Gumeysiga Itoobiya ee ku Jabay Soomaaliya, waxay adeegsadeen Dhamaan Ciidamadoodii oo gaaraya Kumanaan oo askari oo ka soo Cararay Soomaaliya waxay isugu geeyeen S/galbeed waxayna ka sameeyeen wax kasta oo ay kari lahaayeen oo isugu jira Dil, Dhac, iyo Bur-burin”.ayuu sii raaciyay Sheekh Ibraahim.

Jabhadda & Gumeysiga

Mar la weydiiyay halka xaalka Jabhaddu ay marayso mar haddii Ciidamada Gumeysiga Itoobiya ee ka soo baxay Soomaaliya ay gudaha Soomaali galbeed soo galeen ayaa waxa uu yiri“Jabhadu way Sugnaanaysaa, way sugnaaneysaa, way sugnaaneysaa, Saddexdii Bilood ee u danbeeyay oo kaliyana waxay la gashay Cadowga 9 Dagaal”.

Jabhadda & Xiriirka Dibadda

Gudoomiyaha UWSLF Sheekh Ibraahim Maxamed Xuseen ayaa sidoo kale ku sheegay Waraysigiisa in Golayaasha Dowliga ah ay u Bandhigeen gaar ahaan Jaamacadda Carabta kulankoodii ugu Danbeeyay ee Dooxa Qoraalo ka waramaya Waxa ka socda Dhulka S/galbeed“Jabhadu waxay Qadiyadda Ummadda u Bandhigtay Golayaasha Dowliga ah gaar ahaan Jaamacadda Carabta kulankoodii ugu Danbeeyay ee Dooxa, Jabhaddu waxay u gudbisay Waraaqo iyo Bayaano ka waramaya waxa Halkaasi ka socda”

“waxaan u Mahad Celinaynaa Qaar ka mid ah Dowladaha Carabta oo nagu garab istaagtay Mowqif Sharaf leh sida Dowladda Qadar oo xiriirkeeda u jartay Itoobiya Qadiyadda S/Galbeed Awgeed, sidoo kale waxaan u Mahadcelinaynaa Chanalka Al-Jasiira oo aan u Aqoonsanahay Chanalka Kaliya ee ka warama Qadiyada S/Galbeed oo ku jirta xaalada ah haddii aad Kaamero ku dhex Qaadato S/Galbeed inaad tahay Mujrim xukunkiisuna yahay Dil”.ayuu sii raaciyay Sheekh Ibraahim.

Yaa Maal-galiya Jabhadda?

TV-ga ayaa waydiiyay Gudoomiyaha Jabhadda S/galbeed cidda Maalgalisa ayaa waxa uu ku Jawaabay”Ugu horeyn anagu waxaan ku xiranahay ilaahay SW, waxaana nahay Asxaabul Xaqi oo Dulman ilaahayna wuu u gar-gaarayaa kuwa Dulman, midda labaadna anagu waxaan ku xiranahay ilaahay SW ka dibna Shacabkayaga, Dhulkayaga, Tiirarkayaga Aas-aasiga ah, Shucuubta Muslimiinta oo nagarab istaagay iyo Shacabka Soomaaliyeed oo si gaar ah noo garab taagnaa waligii xiriirka aan shacabka Soomaaliyeed la leenahayna waa Xiriir Shacabnimo, Diin, iimaan iyo Dhul, mana aha Xiriir ku qotoma Xukuumadaha”

Xaalka Itoobiya

Sheekh Ibraahim ayaa si faah faahsan uga hadlay Halka ay maanta Itoobiya marayso wuxuuna xusay in ay Siyaasad ahaan, Dhaqaalo ahaan, Milatari ahaan, iyo Bulsho ahaanba u kala fur-furanayso wuxuuna soo qaatay Dhacdooyin dhowr ah oo Bilihii ugu dambeeyay ka dhacay Dalka Itoobiya, isaga oo arimahaasi ka hadlayana waxa uu yiri “Itoobiya waxaan u Aqoonsanahay Dowlad la soo Sameystay, waxay hadda ku jirtaa kala fur-furasho, waxaana weeye 8 Qoowmiyadood oo kala luuqado ah oo kala Diin ah wax kulmiya ma jirto oo Diin, luuqad iyo Dhalasho ah, Qowmiyad walba waxay leedahay Jabhad u Dagaalamaysa inay Ka Xorowdo Itoobiya”.

“Anagu waxaan Dhowraynaa Bur-burka iyo kala fur-furashadda Bulshadda Itoobiya, waxaan sidoo kale Dhowraynaa Bur-burka Dhaqaale ee Itoobiya, 80% Dhaqaalaha Itoobiya wuxuu ku tiirsanyahay Maalgalinta Dibadda gaar ahaan Mashruuca ka hortaga Argagixisadda kaas oo uu siin jiray Maamulkii Maraykanka ee Bush, sidoo kale waxaan Sugaynaa Kacdoon Milatari oo ka dhan ah, 2 Bil ka hor waxaa ka dhacay Itoobiya Afganbi Milatari waxaana la wada Ogsoonyahay in Saraakiil iyo Generalo badan lagu xukumay Dil Toogasho ah, dhanka Falaagoobidda Siyaasadana Isbuucii la soo dhaafay Wasiiru Dowlihii Wasaaradda Warfaafinta Itoobiya wuxuu iska dhiibay Washington, Jabhaddaha Mucaaradka 3 Maalin ka hor waxaa la iskugu yeeray Shir lagu qabtay Washington si rasmi ahna uma ogi wixii uu ku saabsanaa, laakiin waxaan ogahay xaataa Saaxiibkii Itoobiya (Maraykanka) ee Xaqiiqiga ahaa wuxuu bilaabay inuu dib uga fiirsado Malafkiisii ku aadanaa Itoobiya ka dib markii uu Meesha ka baxay Maamulkii Bush yimidna Obama”. ayuu yiri Gudoomiyaha Midowga Jabhadda Xoreynta Soomaaligalbeed(M.J.X.S.G) Sheekh Ibraahim Maxamed Xuseen.

Dhulka Soomaaligalbeed waxaa ka jira Tacadiyo kala duwan oo arxan daro ah iyada oo Shacabka halkaasi ku dhaqan lagala dagaalamo Dhinac walba xag Diin, Dhaqaale,iyo Nololba, waxaana ka jira Caburin xagga Warbaahinta ah si aan looga waramin Falalka guracan ee Gumeysigu ku hayo Shacabkaasi Soomaaliyeed ee Muslimka ah.

Somalimirror :- Assalaamu Calaykum Waraxmatulaahi Wabarakaatuh.

Saleebaan Cali Daahir :- Wacalaykumu Salaam Waraxmatulaahi Wabarakaatuh.

Somalimirror :- Waxa aad tahay wakiilka Walalaha Red Sea ee Jaaliyada Soomaaliyeed Denmark faah faahin naga sii walaalaha Red Sea iyo wax qabadkooda.

Salebaan Cali Daahir:- Bismilaah Al-xamdulilaah Waslaatu walaamu Calaa Rasuuli Laah Salaawaatu Rabii Wasalaamun Calayhi aad iyo aad ayaad u mahadsan tahay Somalimirror hadaan kaa siiyo Red Sea iyo wax qabadkeeda faah faahin hadaan kaa siiyo waa Urur Islaami ah oo u istaagay kheyraadka kana jira Wadanka Denmark daafihiisa ama Caasimadiisa iyo magaalooyinka ku xeeran Ururkaas oo waxqabadkiisu yahay gadhisiinta Dacwada iyo qabshada Nadwooyinka xaga Cilmiga iyo hormarinta xaga cilmiga iyo isku xidhka culimada ayay howshoodu tahay waxaana rajeynaynaynaa insha’alaahu in ma aragtay howshaasu ay hormar gaadho oo Walaalhu Insha’allah ay dadaal ay ku bixiyaan juhuudooda ay bixinayaan aad iyo aad ayaa looga mahad celinayaa oo dhamaan goobaha lagu qabtay nadwaadkaas si xoog leh ayaa looga mahad celinayaa in kasta oo uu qodobkaa soo socdo oo aan dib ka faah faahin doono .

Somalimirror :- waxa aad sheegtay in walaalaha Red Sea ay ka qeyb qaataan arimaha Dacwada iyo kheyrka mar jirtaa wax ka baxsan oo ay ka qeyb qaataan oo arimaha Bulshada ah .

Saleebaan Cali Daahir:- way jiraan arimaha Bulshada way ka qeyb qaataan wacyi galinta maanta taagan Ummadda Somaaliyeed heysta ee ah in la saxo fahamka dhalinyarada iyo dad weynaha in faham laga dhex dhaliyo ee howshaa maanta taagan ee waaqica ah in ay ka dhigaan mid ay Ummadu u midaysan tahay .

Somalimirror :- wax nooga tilmaan kaalinta ay walaalaha Red Sea ku leeyihiin Nadwada ka socota Magaalada Laascaanood.

Saleebaan Cali Daahir:- Bismilaah Nadwadan Laascaanood walaaluhu waxa ay ku leeyihiin gacan weyn ayay ku lee yihiin oo ah xagga maalgalinta Nadwada maaligantaas oo ah xaga Transporti-ga Culimada iyo ma aragtay howlaha kale ee Nadwadu ay u baahan tahay intaba walaaluhu iyagaa ka geystay gacan weyn taasna waan ugu mahad celinaynaa dhamaan dadka iyaguna sidal Local-ka ah “Maxaliga ah” uga geystay gacanta ee sharaa’iga ah ee Isgaadhsinta ah sida Telesom iyo Telecom iyo raga kale ee iyaguna kheyka qaba ee aan la kala hadhin juhuudda dibad iyo gudaba .

Somalimirror:- waxaa jiray Nadwooyin lagu qabatay bilihii la soo dhaafay ama bilowgii sanadkan Magaalooyinka burco iyo hargeysa kaalin ma ku lahayd Nadwooyinkaas Red Sea ?

Saleebaan Cali Daahir:- Ilaahay Mahad ha ka gaadho, Ilaahy Subaxaanahu Wa Tacaalaa aanu u mahad celinaynaa awalan taaniyan waxay fureen Baab ay aad iyo aad markii hore dadku culeys ama Al-baab xidhan inuu yahay ay u maleynayeen oo ah in xagga Dacwada guud xagga Nadwaadku ay ma aragtay ay kala go’an tahay iyo isku socodka Culimada intaba marka waxaa weeyaan walaaluhu Hageysa ayay Nadwadii ugu horeysay ayay si caalami ah ayay ugu qabteen taaas oo lagu baraarugay oo la iska dhaadhiciyay amase ay garteen dadku in howshan ay suurta gal tahay , sidaas oo kale Burcana way ku qabteen tii labaad bay ku qabteen January ee Sanadkan sidaa si la eg ayuu iyadana baraarugaa ugu dhacay waana rajeynaynaa inshaa’alaahu in walaalhu ay howshooda ay horay u sii wadaan oo aanay ka caajisin.

Somalimirror :- sida muuqata ama si dadban u muuqataba ma la dhihi karaa Red Sea waxa ay gaar ku tahay Gobolada Waqooyi Galbeed Soomaaliya hadaan si kale u dhahno Somaliland mise guud ahaan waxa ay ka wada howl gashaa Soomaaliya oo dhan.

Saleebaan Cali Daahir:- walaalaha hadda bilaabay ee hadda howsha wada waxa weeyaan goboladaas ayay ka soo jeedaan lakin mabda’a ay ka duulayaan waxaa weeyaan tayaynta iyo hormarinta Cilmiga ayay ka duulayaan iyo isku xidhka Culimada marka hore Soomaaliya oo dhan marka horaan leeyahay Somaliland marka xigtana waxaa weeyaan Soomaaliya oo dhan , intaa wixii soo raacana inshaa’alaahu in Calaamul Islaami la isku xidho ayaan jareynaynaa .

Somalimirror:- walaalaha Red Sea ee Dibada ku nool Jaaliyadda ay matalayaan ma noo sheegi kartaa Gobol ahaan.?

Saleebaan Cali Daahir:- Jaaliyadda ay matalyaan gobol ahaan iyo heykalka guud ee ay matalayaan waxaa weyaan Madiqadan Somaliland ayay matalayaan oo hadda howshaas ayay u taagan yihiin, taasu waa xaga matalaada , inshaa’alaahu waxaan rajeynaynaa in kheyrkaas uu camimo Soomaaliya oo dhanna uu gaadho.

Somalimirror: Saleebaan Cal Faarax u qeybsaha arimaha Soomaaliya walaalaha Red Sea waad mahadsan tahay .

Saleebaan Cali Faarax :- adigaa mudan aad iyo aad baan Somalimirror ugu mahad celineynaa Ilaahay Subxaanahu Wa Tacaalaa kadib waxaan rajeynayaa in howlaheeno ay si fiican inoogu dhamaadaan Wa Salaamu Calaykum Waraxmatulaahi Wa Barakaatuh.

Shabakadda Warbaahinta Somalimirror waxay idiin soo gudbinaysaa Waraysi aanu la yeelanay Sheekh Axmed Maxamed Suleymaan oo ah Gudoomiyaha Gudiga Qaban Qaabada Nadwada ka bilaabatay Magaalada Laascaanood ee Gobolka Sool.

Somalimirror:- Assalaamu Calaykum Waraxmatulaahi Wabarakaatuh

Sheekh Axmed Maxamed Suleymaan : Wacalaykumu Salaam Waramatulaahi Warabakaatuh

Somalimirror:- Shekh Axmed ku soo dhawoow Somalimirror
Sheekh Axmed :- waan ku dhawahay Baarakalaalhu Fiikum.

Somalimirror:- waxaad tahay Gudoomiyaha gudiga qaban qaabada Nadwada lagu qaban doono Magaalada Laascaanood ee qorshaheedu yahay in uu caawa bilowdo faah faahin guud naga sii nadwada iyo qaban qaabada aad u gasheen?

Shekh Axmed: Bismilaahi Raxmaan Raxiim Nadwada waa Nadwo soo socotay ilaa mudo laba sano gudahood tii sadexaad weeye ee goboladan lagu qabto waqooyiga Hargeysa ayay ka soo bilaabatay Burco , Laascaanood baa hadda fursad u heshay ilaahay mahadiis qaban qaabadeeduna meel fiican ayay maraysaa wax alaala wixii loo baahnaana waa noo diyaar waxaan jecelahay taariikhdii loogu tala galay iyo qaabkii loogu tala galay in Ilaahay idankiis ay ku bilaabato.

Somalimirror:– Culimada Nadwada ka qeyb galaysa xageebay ka kala iman doonaan?

Sheekh Axmed :- Culimadu waxa ay ka imanayaan dhaman gobolada dalka ayay ka imaanayaan waana culimadii wadanka ugu caansaneyd uguna aqoonta badneyd waxaan rajeynaynaa in aad looga faa’iidaysan doono.

Somalimirror:–Nadwada Sanadkan maxay ugu duwan tahay maxayse gaar uga tahay kuwii hore hore?

Sheekh Axmed : - hadaan soo koobo waxyaabaha ay ugu duwan tahay waxaa ka mid ah Mowduuca maanta Nadwada tan ciwaankeeda ah oo ah mowduuc wakhtiga kan aad iyo aad loogu baahan yahay baahi wayn loogu qabo oo ku munaasib ah in wakhtigan aad looga hadlo waxaa kaloo Nadwada tani ay ku sifaysan tahay qaban qaabadeedu waa mid ka sareysa nadwooyinkii horay uga dhici jiray gobolkan ama magaaladan is badalka xaga Tiknoolajigana aad ugu faa’iidaysatay iyadoo sidaad og tihiin laga tabin doono Masaajidka Hudaa nadwada toos looga taban doono Nadwada gude iyo dibadba waa is badal weyn oo ay uga duwan tahay waxyaabihii hore.

Somalimirror :- Ciwaanka Nadwada isna bal sharax inaga sii ?

Sheekh Axmed :- saad ogtihiin ciwaanku “الوسطية و التوازن سمة هذه الأمة” dhex dhexaaadnimada iyo isku dheeli tirnaanta ay Diinta Islaamku caanka ku tahay macanaha waxaa weeye dariiqa saxda ah in dadka loo ifiyo ee musataqiimka ah siduu Ilaahay yidhi “وكذلك جعلناكم أمتاً وسطاً” yacni in umada tan ay noqoto mid xaga siduu ahaa ugu taasan “بين الإفراط والتفيض” aanan xaqii ka xad gubin oo aan ka dheereyn kana gaabin oo aan noqon dad ku xad gudba ama ka gaabiya waajibaadkii si sax ah caqiido ahaan iyo akhlaaq ahaan iyo dhan walba dadka Muslimiinta ah looga dhaadhiciyo wadada toosan ee Quluwiga iyo xad gudubka ku jirin isla markaa gaabinta iyo xuma sameyntu ayna ku jirin in dadka loo iftiimiyo ayay tahay ujeedada ugu weyn ee laga leeyahay ciwaankana laga dhadhansan karo.

Somalmirror:- qorshahiina ma ku jirtaa inaad Nadwada gaadhsiisaan Deegaano ka baxsan Gobolka Sool?

Sheekh Axmed:- haduu Ilaahay idmo Nadwada waxaa lagu tabin doonaa qalabkan casriga ah ee Internetka ,Paltalk-ga dibada gudahana sidoo kale waa laga xidhiidhinayaa gobolada meesha ay ka suura galayso gude iyo dibadba in lagala socon doono ayaan rajeynayaa intii Live ama toos ula socon weydana waa loo duubaya oo si dhakhso ah ayay u gaadhi doontaa Insha’allahu Tacaalaa.

Somalmirror:- hadii aad tihiin gudiga qaban qaabada Nadwada sida muuqata ama si dadbanba u muuqata sida muuqataba waxaa baxaya kharashaad loogu tala galay Nadwada inta ay socoto kharashaadkaas yaa idinka gacan siiyay?

Sheekh Axmed :- Soomaalidu isku tashi ayay maalmaha kan ku jirtay oo hormar ay gaadhay weeye markaa sama falayaasha Soomaalida ah dibad iyo gudaba ayaa wax isku daray tabarucaadkoodii oo jeebkooda ka bixiyay baa nadwada tan qaban qaabiyay aad baan ugu mahad celineynaa kheyr Alle ha siiyo, sidoo kale waxaa qeyb ka qaadanaya Shirkadaha Isgaadhsiinta oo iyaguna ku deeqay Internet-ka iyo Taleefanada iyo Isgaadhsiinta iyagana aad ayaan ugu mahad celineynaa koleyba waa isku tashi soomaalida dhex deedu ay isku tashatay oo ay iyagu iska aruuriyeen .

Somalimirror :- waxa Hey’adda ah oo Nadwada ka qeyb qaadatay ma jirtaa ?

Sheekh Axmed :- maya ma jirto wax Hey’ad ah oo ka qeyb qaadatay Soomaalidu in dhaweydba wax Hey’ad ah kuma xidhneyn isku tashi dhexdooda ah ayaa howlahan lagu waday in dhaweydba.

Somalimirror :- Sheekh Axmed Maxamed Suleymaan Jasaaka laahu Kheyran.

Shekh Axmed : wa iyaaka.

 Prof. Maxamed Cumar Dalxa oo Shabakada Somalimirror la xariirtay ayaa dibu dhaca fadhigii Maanta ee Baarlamaanka ku sheegay inaanu aheyn mid rasmi ah oo horey loo shaaciyay fadhigu balse uu yahey mid hor u dhac u ah fadhiyada xiga ee rasmiga ah laguna ogeysiinayay Xubnaha Baarlamaanka inay isu diyaariyaan laguna kala warqaato.

Prof. Dalxa oo ugu horeyn aanu wax ka weydiinay sababta keentay baaqashada fadhigii Maaanta dibu dhaco waxa uu ku jawaabay sidatan:“Horta Marka hore waxaad moodaa arintaan bari dhaweed markii uu Gudoomiyaha uu Iclaaminaayey in Shirku uu dhicidoono 15-ka wixii ka danbeeyo ee laxiriirtay in ay soo galaan Xildhibaanada badi oo hada Fasax iyo shaqo kumaqan intaba ay ahaayeen ayaa waxaad moodaa in loo fasirtay 15-ka ayuu Dhacayaa kulanka in layiri oo kale, balse arintu saasmaaheyne waxay aheyd in laga bilaabo waxa ka danbeeyo 15-ka lagabilaabo in uu Caadiyan Baarlamaanka Kalfadhiyadiisii ay bilaaban Doonaan marka sidaasi aawadeed ayaa loogu baaqay in ay soo wada galaan dhamaan Xildhibaanada  inta haatan ka maqan Xarunta”.

Ajandaha ugu horeeya ee Baarlamaanka hor yaala xilliga ugu horeeya uu fadhiisanayo mar aanu wax ka weydiinayna waxa uu ku jawaabay:“Shaqooyinka Caadiga ah ee Baarlamaanka uu wada inta badan waxaa Faraha kula jiray Gudiyadoodii, laakin ajandihii Yiilay ee ahaa dhinaca Badda Xageeda oo isna aad iyo aad hadal heyntiisa u badneyd ayaa ajandaha la doonayo marka Xildhibaanada ladajiyo imaanayaa”.

Baaqashada fadhigii Maanta ee Baarlamaanka in looga gol lahaa daboolida ka hadalka heshiiskii is afgarad ee xagga Badda ee dhex marey DKMG ah & Kenya, mar aanu weydiineyna waxa uu ka yidhi:“Baarlamaanka ayey ka timid Mooshinka Xildhibaanaa keenay hadii Baarlamaanka uusan rabin in uu ka Hadlo lama keeneen Mooshin markaa Dadkii hadalka saas u yiri iyaga unbey ku kooban tahay Baarlamaanka isaga oo ka turjumayo Dareenka Shacabka in uu  iyaga Qanciyo ayuu Baarlamaanku arintaa u keenay , insha Allah waxa rajeyneynaa dhawaan wax Dalka, Dadka iyo Umada Soomaaliyeed Qancinkaro oo shaki bixi karo in ay ka soo baxaan kulankaasi ugu horeeya ee looga hadli doono arintaasi”.

Aragtida Baarlamaanka ee ku aadan Heshiiska Badda mar sidoo kale aanu wax ka weydiineyna waxa uu ka yidhi:“Hada anagu Baarlamaan manihin Baarlamaanku waa midka hada ay horyaalaan Ajandaha in laga hadlana loo balan sanyahay marka mar hadii Baarlamaanku Diyaar u yahay in uu ka hadlo waxa aan aniga hada si gooni ah aan u sameeyo waxba soo kordhin meyso laakiin Go’aankii Rasmiga ahaa ee Sharciga ahaa oo in lagu dhaqmo kabacdi ay noqon doonto ayaa waxa uu noqon doonaa kan hada loo balan san yahay markaa in aad ka warsugtaan baan Cosan lahaa Shacbigana kaas ayuu noqon doonaa midka ay ku kala baxaan”.

Xilliga xigga ee Baarlamaanku fadhi yeelanayo mar aanu wax ka weydiinay waxa uu sheegay in dib ka soo sheegayaan balse aanu jirin hadda xilli u go’an.

Waxa uu sidoo kale ka Hadley Xaalada Amaan ee fadhiyada Baarlamaanka, wuxuuna sheegay arintaa inay ula siman yihiin shacabka ku dhaqan Magaalada Muqdisho.

Dhanka kale Cismaan Cilmi Boqore oo ah Godoomiye Xigeenka Labaad ee Baarlamaanka oo la Hadley Somalitalk ayaa sheegay in fadhigii Maanta ee Baarlamaanku u baaqdey koronto la’aan.

Sh.Cali Warsame

24/kii bishan ayaa Waagacusub lagu faafifiyey waraysi la sheegay inuu siiyay Shiikh Cali Warsame Xasan Shababakada Waagacusub oo uu kaga hadlay dhaliilo uu usoo jeediyey waxgaradka iyo Culimada Koonfurta Somaliya , taasoo ay ku tilmaameen inay indhaha ka qabsanayaan dhibaatiooyinka iyo colaadda ka taagan somaliya ee ay horseedka ka yihiin Shakhsiyaadka ka soo jeeda Waqooyiga Somaliya.

Hadaba si aanu wax uga ogaano Arimahaas ayay Shabakada Somalimirror waraysi la yeelatay Shiikh cali warsame xasan oo jooga Magaalada Burco. ugu horayn waxaanu Shiikha waxka weydiinay Ujeedooyinka loo aasaasay Hay’ada Culimadda Somaliyeed wuxuuna ku jawaabay “Sida ku cad Go’aamadii ay Hay’addu soo saareen waxaa loo aasaasay inay Ummadda u noqdaan (Marjic) loola soo noqdo wixii Masalooyin Diini ah ee layku qabto, iyo in laga shaqeeyo wixii Umadda maslaxadeeda iyo towjiihinteeda iyo inay umaddu maraan dariiqa saxda ah. Hay’aada Culimada soomaliyeed waa mid isu taagtay toosinyta Umaada iyo u nasteexaynta Xukuumad iyo shacabba Mana aha Hay’adda Culimada Somaliyeed Urur siyaasiy ah ama xusbi ka mid ah Axsaabta u tartamaya inay helaan masab siyaasi ah, mana aha Urur u xaglinaya dhinac siyaasi ah.

Somalimirror :- Shiikh Cali Warsame sidee u aragtaa Waxyaabaha ka dhacaya Koonfurta Somaliya?

Sh, Cali Warsame:- Aragtidaydu caam ahaan waxay waafaqsan tahay wixii ka soo baxay mu’tamarkii ay Hay’aad Culimada Somaliyeed ku qabteen Magaalada Muqdisho ee isugugu jirey Go’aamo, Fatwooyin, Nasteexooyin iyo towjiihaadba. hadaan ku darsado inyar oo Aniga ii khaas ah waxaan lee yahay waxaan nasiib darro u arkaa inuu dagaal ka dhex dhaco Walaaladii Safka keliya kuwada jirey shalay markii dalka cadowgu haystey inuu ka dhex dhaco Dagaal sabab u noqda qax iyo barakicin dadka shacabka ah ee dagaalladu daashadeen. Waxaan leeyahay Illaahay haka cabsadaan, hana ka cabsadeen habaarka dadka dhibaataysan ee habaaraya kuwii bara kiciyey, habaarka dadka dulmani waamustajaab(waa la qabalaa).

24/kii bishan ayaa Waagacusub lagu faafifiyey waraysi la sheegay inuu siiyay Shiikh Cali Warsame Xasan Shababakada Waagacusub oo uu kaga hadlay dhaliilo uu usoo jeediyey waxgaradka iyo Culimada Koonfurta Somaliya , taasoo ay ku tilmaameen inay indhaha ka qabsanayaan dhibaatiooyinka iyo colaadda ka taagan somaliya ee ay horseedka ka yihiin Shakhsiyaadka ka soo jeeda Waqooyiga Somaliya.

Hadaba si aanu wax uga ogaano Arimahaas ayay Shabakada Somalimirror waraysi la yeelatay Shiikh cali warsame xasan oo jooga Magaalada Burco. ugu horayn waxaanu Shiikha waxka weydiinay Ujeedooyinka loo aasaasay Hay’ada Culimadda Somaliyeed wuxuuna ku jawaabay “Sida ku cad Go’aamadii ay Hay’addu soo saareen waxaa loo aasaasay inay Ummadda u noqdaan (Marjic) loola soo noqdo wixii Masalooyin Diini ah ee layku qabto, iyo in laga shaqeeyo wixii Umadda maslaxadeeda iyo towjiihinteeda iyo inay umaddu maraan dariiqa saxda ah. Hay’aada Culimada soomaliyeed waa mid isu taagtay toosinyta Umaada iyo u nasteexaynta Xukuumad iyo shacabba Mana aha Hay’adda Culimada Somaliyeed Urur siyaasiy ah ama xusbi ka mid ah Axsaabta u tartamaya inay helaan masab siyaasi ah, mana aha Urur u xaglinaya dhinac siyaasi ah.

Waxaan kaloo arkaa oo iyana nasiib daro ah in dadkaa dagaalamaya dadka ay iska dilaan lagu magacaabo shuhado, wixii ay kala qaateen ee aduunyo ahna qaniimo lagu magacaabo, wixii ay dhul kala qabsadeena (Taxriir) xorayn lagu magacaabo. Arintaasi waa arin ka fog Caqliga iyo Sharciga labadaba. Nebigu SCW rag saxaabadiisa ka mid ah oo ku dhintay dagaallo uu hogaaminayey ayuu u diiday in lagu magacaabo shahiid sababatoo ah Qaniimadii oo aan la qaybin ayuu Hoos gunti ka xaday.Maadaama Nebigu hoosgunti shahiidnimadii kaga qaaday intee ayay maanta uga dhigantaa Dunuubta la gelayo inta dagaalka lagu jiro. wixii shacab ah ee dagaaladaas ku dhex dhinta waxaan shaki ku jirin inay shuhado ytihiin.WAXAAN LEE YAHAY INAALILAAHI WA INAAILEYHI RAAJICUUN! Waxaan Illaahay ka baryaynaa in Ummadda dariiqa saxda ah kusoo celiyo oo aragti sax ahna ay isugu yimaadaan.

Somalimirror :- Shiikh cali waxaa jirtey in Shabakadaha qaar lagu faafifiyey waraysi la sheegay inaad siisay Shabakada Waagacusub oo nuxurkiisa ahaa dhaleecayn aad usoo jeedisay Axmed Godane oo ka mid ah Hogaanka Ururka Alshabaab iyo weliba dhaliilo la sheegay inay ku wajahnaayeen wax garadka iyo Culimada Konfurta Somaliya kuwaasoo la sheegay inay indhaha ka qabsadeen Dad Colaad ka abuuraya K/Somaliya taasoo ay ula jeedeen xubno ka tirsan Ururka Alshabaab oo ka soo jeeda Waqooyiga Somaliya.maxaad arinkaas ka leedahay.

Shiikh cali Warsame:- Arintaasi waa Arrin aaan inkiray Jumlatan wa tafsiilan( la yaabay) waana been Abuur qaawan, oo layga been abuurtay, waxaan u arkaa Masuuliyad darro cidii soo gelisey meediyaha, mana jiro cid ila soo samaysey xidhiidh ha noqoto Shabakada Waagacusub ama cid kaleba oo arinkaas ku saabsan wax waraysi ah oo ay ila yeesheena ma jiro. aad ayaan ula yaabay markii aan ku arkay waraysigaas been abuurka ah,

Ma jiro cid aan usoo jeediyey canbaarayn, mana jiro cid aan usoo jeediyey dhaleecayn,

Waxaan lee yahay Illaahay kaga cabsada hadalkiina, ogaadana in masuuliyadaas wax qorista Illaahay idin weydiinayo, kana daaya Umadda Hadalada abuuraya Fidnada kana shaqeeya wixii Umadda isu soo dhawaynaya.

Somalimirror:- Shiikh Cali Warsame Maxaad usoo jeedin lahayd Gobolada Somaliya ee maanta kusugan Nabadgelyada sida S/land iyo Puntland?

Shiikh cali Warsame:- Waxaan usoo jeedinayaa inay Ilaashadaan Nabadgelyadooda uu Illahay ku galadaystay oo ay ku cibro qaataan waxyaalaha walaaladood haysta ee dhibaatooyin ah, Illaahayna (SW) ay u baryaan Inuu iyagana ka saaro waxa ay ku jiraan ee dhibaato iyo isfaham la’aan ah, Nabadeynna ay ka geystaan wixii ay ka geysan karaan, Shareecada Islaamkana ay ku dhaqmaan taasoo ah ta keliya ee If iyo aakhiroba lagu liibanayo.

Shiikh cali warsame xasan ayaa ka mid ahaa Gudiga Culimada Soomaaliyeed ee beryahanba dhexdhexaadinta ka dhex wadey dhinacyada isku haya siyaasadda soomaaliya, waxaana sheekha lagu yaqaannaa samo ka talin iyo in laga hortago wixii dhibaato umadda u keenaya, sidoo kale sheekhu wuxuu ka mdi yahay dadkii cimrigooda ku soo dhammeeyay faafinta diinta islaamka iyo u halganka dhaqan galinta shareecada iyo noolaynta sunnadii nabiga S.C.W.S.

Warbaahinta afsoomaaliga ku hadasha qaarkeed waxaa maalmahan danbe ka muuqda inay shaqo ka dhigteen dicaayado been abuur ah oo la doonayo in wax loogu dhimo sumacadda culimada iyo ducaadda soomaaliyeed ee umaddu khayrka ku baratay,arrintaasina waxay daliil cad u tahay inay dadkaasi colaad xeel dheer u qabaan dadka ku howlan hanuuninta umadda ee u taagan samata bixinteeda aakhiro iyo adduunba, Dicaayadaha noocan ah waxaa loo qaadan karaa inay ka danbeeyaan gacmo shisheeye oo adeegsanaya dad soomaali ah shakina kuma jiro ninkii buur hardiya in maduxu burburi doono isaga oo aan buurta wax u dhimin.