Somali Mirror » Wararka

Wasiirka Sudan u fadhiya Itoobiya oo wariysi siiyay Shabkadda Somalimirror

Somalimirror — Fri, 30 Jul 2010 22:20:15 +0000

Safiirka Dalka Sudan u fadhiya Dalka Sudan Maxamed Yuusuf Xasan oo waraysi siiyay Shabakadda Somalimirror ayaa sheegay Dowladoodu ay taageersan tahay Heshiiskii ay shalay Hotelka Ghion ee Magaalada Addis Ababa ku kala saxiixdeen Jabhadda Midowga Xoreynta Somaligalbeed iyo Dowladda Itoobiya .

Ugu horeyn waxa uu Wariysigaa Safirika sudan uga warbixiyay in sida ay Dowladda Sudan u aragto Heshiiska ay wada gaadheen wuxuuna Wasiirku sheegay in ay aad u soo dhaweynayaan heshiiskaas aragti ahaana uu u muuqdo mid wax badan ka taraya loonankii mudada soo jiray ee geeska Afrika , si ahaan heshiiskaa waxa uu xad u yeeli doonaa burburkii iyo dagaaladii iyo gabood faladii kale ee ka jiray gobolka wuxuuna horseedi doonaa in Gobolkaa uu noqdo mid ka muuqada madiqadda.

Waxa uu Safiirku xusay in mar hadii la doorta wada hadal uu yahay wada hadalku wadada kaliya ee xalka muuqda lagu gaadhi karo ama si kale hadii la dhoho ay labada dhinac ee is diidsani isku soo dhawaan karaan ama dhinac walba lagu ogaan karo waxa uu doonayo in uu helo .

Su’aal uu waydiiyay wariyaha oo ahayd gobolka Ogadeeyna ama Somaligalbeed waxaa lagu tilmaamaa in uu xudun u yahay xasilooni darada ka jirta Geeska Afrika marka taas sideebaad u waragtaa waxa uu Safiirku uga jawaabay “run ahaantii Gobolka Geeska Afrika waxaa ka jira loolan dhinacyo badan leh una dhaxeeya shucuub kala duwan lakin sida aad xustay waa la dhihi karaa waa qeyb ka mid ah mushkiladda ka jirta mandiqada waa la dhihi karaa xal ayuu u keeni karaa gobolka si ahaan is haysiga Somaaliya iyo Itoobiya inta badan waxa uu ahaa mid salka ku haya gobolkan jabahadda hadda heshiiska gashayna waxa ay ahayd mid 18 sano sida uu Gudoomiyahoodu sheegay dagaal ku soo jirtay ,intaa hadan ka gudubno waxaan ku rajo weynahay in arintaa(heshiiska ) hadii ay labada dhinac ka run sheegaan waxa ay ku heshiiyeen taas waxa ay keenaysaa in hormar muuqda laga gaadho heshiiskan waana ku rajo weynahay in ay arintaa dhici doonto”.

Safiirka waxa uu ku nuux nuusaday in Dowladda Sudan ay tahay Dowladda kaliya ee ardayda Soomaalida ah siiday Deeq waxbarasho arintaana waxa uu ku tilmaamay in ay tahay Waajib ka saran walaalahooda Somalida ah wuxuuna yidhi “Soomaaliya waa Dal aan walaalo nahay waxayna arinta waxbarashadu keenaysaa in qofka waxbartaa uu si wanaagsan u fikiro ,Somalia waa dal ay ka jiraan dhibaatooyin kala duwan ,dagaal ,fakhri,gaajo ,abaaro,iyo cuduro kala duwan oo soo rita dhalaanka ama jiilka soo baxaya ,run ahaantii wadamada kale ee Carabta labaabada ay Sudan qaaday ma aysan qaadin waana ku rajo weynahay in uu soo noolaado kaalimaha Wadamada Carabta”

Dhanka kale waxa uu Wariyuhu waydiiyay safiirka in Midowga Afrika uu isku raacay in aysan Maxkamadda Caalamiga ah ee dambiyada dagaalka aysan u gacan galineyn Madaxweynaha Sudan Cumar Xasan Al Bashiir dhanka kale Waxaa jirta in Maxkamadaasi ay shaacisay in ay dooneyso in ay xafiis ka furato Magaalada Addis Ababa “ Midowga Afrika waxa uu qaatay labaadii looga baahnaa aragti ahaan Maxkamadaa waxa ay sheegayso wax jira ma ahan waayo dhibka ay sheegayso kuna eedayneyso Madaxweynaha waxaan tilmaami lahaa talaabadaas waa mid aan si wanaagsan u soo dhaweyneyno ,si guud waxaan u dhihi karaa waa mid aan si guud ugu faraxanahay in Midowga Afrka uu garab istaago Dowladda Sudan , arinta aad ku liqaaday ee ah Maxkamada adaaba saxafi ah waadna la socotaa halka uu Midowga Afrika ka taagan yahay arimntaa”.

Safiirka oo ka jawaabayay su’aal ahayd in Dowladda Sudan ay ka qeyb galeyso ciidamada Midowga Afirka ee la qeynayo Soomaaliya waxa uu Safiirku ugu jawaabay “ si guud waan taageereynaa talaabadaa waana ku raacsanahay Midowga Afrika lakin sudan ma ahan mid wax ciidan ah u diri doonta Soomaaliya waayo arintaasi waxa ay dhib ku keenaysaa labada shacab ee walaalaha ah kaliya Sudan waxa ay uga qeyb qaadan doontaa wixii fikrado ah ee looga soo baahdo”

Waraysiga uu Shabkadda Somalimirror siiyay oo dhinacyo badan taabanayay ayaan qodobadaa dhowrka ah ee ugu muhiimsanaa ka soo qadanay waxaana wariysigaa qaaday Wariye ka tirsan Somalimirror oo ka qeyb galay shirkii Heshiiska UWSLF iyo Dowladda Itoobiya ee ka dhacay Magaalada Addis Ababa.

Maxaad kala socotaa waxqabadka Golaha isutaga Masaajida ee W/Maraykanka

Somalimirror — Fri, 30 Jul 2010 16:59:32 +0000

Golaha isutaga Masaajida ee W/Maraykanka waa Organization Non Profit ah,Waxaana la aas aasay dhamaadkii sanadkii 2000kii,wuxuusa si rasmi ah u dhaqangalay sanadkii 2001dii

Ujeedooyinkii loo aas Aasay:-

1-Dhismayaasha Masaajida iyo Maraakista Islaamiga ah.
2-Midaynta Awooda Masaajida iyo Maraakista Jaaliyada .
3-Xalinta qilaafaadka Jaaliyada mid guud iyo mid gaar ahba. sida Xalinta dhibaatooyinka qoysaska.

4-Ka jawaabida masaa’isha Diiniga ah{Fadwah}.

5-Iclaaminta{Sheegida soogalida iyo bixida bisha Ramadaan si loo ilaaliyo midnimada umada.

6-Diyaarinta ducaad{Culimo} si ay jaaliyada uga haqabtiraan baahida Diimeed.
7-Wacyi galinta dhalinta da’da yar ee qurbaha,si looga ilaaliyo dhaqan xumada iwm.

8-Gaarsiinta Dacwada{Islamka}Dadyooga kale ee aanan muslimka ahayn.

Waxqabadkii Golaha mudadii uu jiray.

• Goluhu Ilaahay fadligii ka gadaal wuxuu ku guulaystay mudadaas u jiray inuu gobolo badan oo ay Soomaalidu dagtay ka dhisaan Masaajid iyo Maraakis Islaami ah.

• Golaha isutaga Masaajida,markii ugu horaysay ee la’aas aasayay wuxuu ka koobnaa{6Masajid maantana wuxuu marayaa ilaa(17)Masaajid.oo badankood ay yihiin mulki ay leedahay Jaaliyada Soomaaliyed.waxayna ku timid ilaahay fadligii kagadaal midnimada iyo wadajirka Golaha.

• Goluhu wuxuu mideeyay ilaahay fadligii kagadaal,awoodii kala tagsanayd ee Masaajida Gobalada,sida Midaynta Mu’tamaraadka,Dhaqaalo aruurinta{fundraising}IWM.

• Goluhu mudadaas wuxuu ku guulaystay xalinta khilaadyo faro badan oo soogaray oo isugu jiro,kuwo family iyo kuwo ganacsi{Shirkado}.
• Goluhu wuxuu ku guulaystay ilaahay fadligii kagadaal inuu midiiyo soogalida bisha ramadaan in iskumar la soomo lana afuro iyadoo laraacayo sunadii nabiga iyo qaabkuu u soomi jiray.
• Goluhu mudadaas uu jiray wuxuu ku guulaystay inuu xaliyo dhibaatooyin in badan haystay shaqaalo badan oo jaaliyada ka mid ah dhibaatooyinkaas oo ay kala kulmi jireen warshadaha, hilibka iyo warshado kaleba,waxaana dhibaatooyinkaas ugu waa waynaa xaga cibaadaadka.

Masaajida iyo Maraakista ku midaysan Golaha.

1-Masajidka abu-bakar asadiq Minneapolis,MN

2-Masjidka Al-Ixzan St.paul,Mn

3-Masjid Ibnu-taymiyah Columbus,OH

4-Masjid Arahma Owatanna,MN

5-Masjid Ataqwah Kansas,MO

6-Masjid bilal pelican rabe,MN

7-Masjid Asunah Atlanta,GA

8-Masjid al-ansar Sandiego,CA

9-Masjid Arahmah Phenix,AZ

10-Masjid Al-faruq Nashville,TN

11-Masjid Al-huda Salt lake city,Ut

12-Masjid Abu-bakar Asadiq Seattle WA

13-Omaha Islamic Center Omaha,NE

14-Masjid Billaal Portland,ME

15-Masjid Atawfiq Boston,MA

16-Faribault Islamic Center Faribault,MN

17-Lewiston Islamic Center Lewiston ME

Iyo maraakis yar yar oo ku yaalo tooliynka qaarkood oo hoostago masaajida waawayn ee gobalada.

Wixii faah faahin intaa dheer kala xiriir Madaxa Fulinta Golaha Iimaamyada ee W/Maraykanka.

Sheekh C/llaahi Abul-fadli. Smajlis210@gmail ama kulmiye99@hotmail.com

Heeshiiskii Ururka WUSLF iyo Itoobiya oo Nuqul ka mid ah la soo gaadhsiiyay Somalimirror

Somalimirror — Fri, 30 Jul 2010 14:12:40 +0000

shabkada Somalimiror waxaa soo gaadhay nuqul ka mid ah heshiiskii ay Dowlada Itoobiya iyo Jabhadda Xoreynta Somaaliglabeed (UWSLF) ku kala saxiixdeen Hotelka Caalamiga ah ee Ghion ee Magaalada Addis Ababa wuxuuna qoraalkasi u qoraa sidan:-

boga sadexaad ee Heshiiska UWSLF iyo Itoobiya

boga labaad ee Heshiiska UWSLF iyo Itoobiya

boga kowaad ee heshiiska UWSLF iyo Itoobiya

Xarakadda Shabaabul Mujaahidiin oo sheegay in ciidamada la keeno doono Somaliya ay Muqdisho qabuuro u noqon doonto

Somalimirror — Fri, 30 Jul 2010 13:57:26 +0000

Xarakada Shabaabul Mujaahidiin ayaa wacad ku martay in ciidamada Afrikaanka ah ee lagu wado in ay Muqdisho yimaadaan ay halkaa uga qodi doonto qabuurihii lagu aasi lahaa sidoo kalena ay sii wadayso dagaalkii Jihaadka ahaa ee ay ku jirtay Xarakardaasi.

Af hayeenka guud ee Al shabaab Sheekh Cali Maxamuud Raage “Sheekh cali dheere” ayaa sheegay in ciidamada ay wadamada Afrikaanka ahi u soo diri doonaan soomaaliya ay noqon doonan kuwa ku halaagasami doono dagaalka ay u soo socdaan in ay la galaan xarakoooda wuxuuna yidhi “ciidamada la soo dirayo ee dheeriga ahi waa kuwo dhamaan doono noocey doonaanba ha noqdeene Ilahaay idankii Muqdishana waxa ay noqon doontaa qabuuro”

Sheekh Cali Dheere waxa uu tilmaamay in wax badan ay la socdaan ciidamada la soo dirayo, meelaha ay dagi doonaan iyo hub ahaan waxa ay sitaan ee qalab ah,waxa uu intaa ku daray in xarakadoodu ay tahay mid u diyaar ah dagaal ay ciidamadaa la gasho.

waxa uu sidoo kale Sheekh Cali Dheere sheegay in DKMG ah ay ku fashilantay in caalamka uu ka yeelo codsiga ah in ay cidan u soo diraan Soomaaliya wuxuuna yidhi “Xukuumadda Khaa’inadda ah way ku fashilantay ugu horeyn in madaxdeeda kufaata ah ay ciidamo u keenaan soomaaliya lakin hadda ayay sheegeen in ay doonayaan in ay ciidamo u soo diraan Muqdisho mana sameyn doonaan wax dhaq dhaqaaq ah ”

dhanka kale DKMG ah ayaa soo dhaweysay maalinimadii Arbacada ahayd go;aankii ka soo baxay Midowga Afrika ee ahaa in ciidamo dheeri ah loo diro Soomaaliya si ay u bad baadiyaan DKMG ah sidoo kalena ay meesha ugu saaraan Xoogaga kacdoonka wada oo uu Midowga Arika ku tilmaamay in ay yihiin Argaagixiso caalami ah .

Midowga Afrika ayaa dhankiisa sheegay in bisha inaga soo fuuda leh uu diyaar garen doono 6 kun oo askari si ay ugu biiraan ciidamada nabad ilaaliyayaasha ah ee hadda ku sugan Soomaaliya ,wuxuuna Midowgu dhanka kale xusay in ciidamadaa aysan noqoneysn kuwo nabada oo kaliya ilaaliya balse ay yihin kuwo dagaalo gali kara sidoo kalena wax difaaci kara.

lama saadaalin karo sida uu noqon doono xaalka Soomaaliya marka laga fiiriyo hadalada iska soo horjeeda ee ka soo kala baxaya DKMGa ah , Midowga Afrika ,Xoogaga Al shabaab iyo Xisbul Islaami kuwaas oo ku dhawaaqay in mid walbaa midka kale oo cagta marin doono.

Dowladda Itoobiya & Ururka UWSLF oo qabtay Shir jaraa’id oo wada jir ah

Somalimirror — Thu, 29 Jul 2010 22:53:05 +0000

waxaa si wada jir ah Hotelka Ghion shir jaraa’id ugu wada qabtay Ururka UWSLF iyo Dowladda Itoobiya wuxuuna shirkaasi ahaa mid ay ku faah faahinayeen heshiiska ay wada gaadheen iyo waxyaabaha sharxidda u baahan ee saxaaddu dooneyso in loo bidhaamiyo waxaana Shirkaa, jaraa;id wada joogay Gudoomiyaha Ururka UWSLF ,Wasiirka Arimaha Federalka Itoobiya Dr Sheferow Tegla Mariam iyo Madaxweynaha Dowlada Deegaanka Somalida Itoobiya Cabdi Maxamed Cumar.

Shirka jaraaid waxaa goob joog ka ahaa qeybaha kala duwan ee Saxaafaddda Calamiga ah iy midda Maxaliga ah ee Itoobiya Wakaaladka Wararka ee ku hadla Afafka kala duwan ,sidoo kale waxaa madasha joogay TV-ga Al jazeera qeybtiisa Afka Carabiga ku hadasha.

shirkaa jaraa’id waxaa si rasmi ah u furay Dr Sheferow wuxuuna saxifiyiinta u dar daarmay in ay su’aalahoodu noqdaan kuwo cad kuna saabsan heshiiska ee aysan noqon kuwo arimo kale ka hadlaya , wuxuuna intaa kadib sharxay qaabka uu ku soo bilowday wada hadalka u dhaxeeyay Dowladda Itoobiya iyo UWSLF wuxuuna sheegay in wax badan ay wada hadaladaasi soo socdeen haddana ay si guul ah ku soo gaba gaboobeen wuxuna yidhi isagoo arimahaa ka hadlayay “sida la wada og yahay heshiiska mudo ayuu soo socday shirar kala duwana labada dhinac waa ay yeesheen dhamaan guul iyo is faham ayay ku soo dhamadeen wuxuna heshiskan noqonayaa mid taariikhda gala sidoo kalena horseeda nabadda iyo hormarka Deegaanka Soomaalida si gaar ah si guudna Itoobiya oo dhan ,dhankayaga wax walba sidii la rabay ayay ka yihiin dhanka kalena sidaa si la mid ah ayaan ka rajeynaynaa”

intaa kadib waxaa su’aal la waydiiyay Gudoomiyaha Ururka UWSLF Sheekh Ibraahim Maxamed Xuseen waxayna su’aashaasi ahayd – ma la dhihi karaa Ururkiinu heshiiskan waxa uu u qaatay qaab taagtiig ah wuxuuna Sheekh Ibraahim su’aashaa uga jawaabay “Ururka si guud waxa uu u qaatay istaariijiyadda uu hadda saxiixay ee ma ahan taagtiig Ururku in badan ayuu soo jiray wada hadalna yeeshay isaga dhexdiisa ka hor inta aanan Dowladda hor fadhiisan ,waxaa jirtay in uu Ururku shir ku qabtay Magaalada Cadaadle ee Gobolka Godey oo isaga u gaar ah shir guud oo wada tashi ah waxa uu Magaalada Godey kula yeeshay dhamaan qeybaha kala duwan ee Bulshada Deegaanka ku dhaqan dhamaantoodana waxa ay taageereen Istaraatiiyadda uu qaatay Ururka ee ah in uu wada hadal nabadeed la furo Dowladda Itoobiya”

Wariyaha Somalimirror oo goobta shirkaa ku sugnaa ayay u suura gashay in uu Dr Sheferow waydiiyo su’aashan – si guud ma loo dhihi karaa heshiiskan waa mid ku dhisan awood qeybsi (Power Shering) u dhaxeeya UWSLF iyo Itoobiya , muxuuse yahay qorshaha Dowladda ee ku aadan UWSLF wuxuuna Dr Sheferow uga jawaabay ” markaan shirka bilaabaynay waa anigii idhi waa in su’aashu ay cadaan tahay kuna saabsan tahay ajandaha shirka lakin hadda taas ma muuqato ,UWSLF waa dad muwaadiniin ah xaqna u leh in ay Dowladda dhex galaan waa ay isa soo sharixi karaan waa la dooran karaa ,Dowladdu talo ayay waydiisaneysaa khibradooda ayay ka faa’iidaysaneysaa ,si wada jir ah ayay wax u wada qabsanayaan iyagoo wada tashanaya wada jira mar walba ma kala maarano — hadan u laabto waxa aan ka dambacsanahay waa sidaa aaan kuu sheegay ee faah faahin uma baahna wiil da’yar ayaad tahay waana arkaa in aad su’aasha Af Carabi igu weydiisay”

intaa kadib waxaa Sheekh Ibraahim Dheere la waydiiyay in ay Siyaasadda ka qeyb qaadan doonaan iyo in kale wuxuuna ugua jawabaay “siyaasadda hadaba waan ku jiraa waana ka qeyb qaadaneynaa lakin ma ahan mid ah shardi ku xidhan heshiiska oo ah hadan siyaasadda nalaga qeyb galin heshiiska ma soconayo ee waa aan u madax banaanahay aanana ahayd shardi ,siyaabo badan ayaan siyaaasadda uga qeyb gali karaa lakin waa shardi la’aan ,,,,,, Ururku waxa uu qaatay labo waxyaabood midda koobaan waa nabdda mida labaad waa nabada mida boqolaad waa nabada tan talena waa hormarka ”

Madaxweynaha Dowlada Deegaanka Soomalida ayaa dhankiisa la wayiiyay su’aal ahayd in uu gobolka Soomaalidu yahay gobol dhib u dhac iyo dhibaato ka jirto arintaasina ay tahay mid Madax kasta oo deegaankaa soo martaa ay ka dhigaan ajandahoda koobaan hadana aysan waxba ka qaban wuxuu Cabdi Maxamed Cumar uga jawaabay”gobolka wuu dib dhacsanaa waxaana ka jiray colaad waxaana ku rajo weynahay in si deg deg ah gobolka looga dareemo hormar dhan walba ah horseedana hormar buuxa oo deegaanka ka dhasha , hadda waxaa la taaban karaa in meel maalmo loo kala socon jiray sacado loo kala socdo kadib markii la dhisay wadada Laamiga ah sidoo kale waxaa meelo kala gadisan la gaadhsiiyay Adeega taleefankada Mobile-ka iyo Korontada 24 Saac ah inta dhimana waan ku taba jiraa in aan dhameyno anagoo celeys kastaa ugu dhabar adeygayna,,,, waxaana garabka ONLF ugu baaqayaa mar walbana ugu baaqnaa in ay nabadda qaataan kana qeyb galaan hormarka dalkooda iyo badbaadinta dadkooda mar walba waxaan diyaar u nahay inaan ONLF la hadlo”

shirkaa jaraa’id ayaa socday ku dhawaad mudo saacad ah waxaana si rasmi ah u soo xidhay Dr Sheferow Tegla Mariam ,wuxuuna gaba gabadii shirka u mahad celiyay Saxaafadda iyo sida wanaagsan ee ay uga soo qeyb gashay shirka wuxuuna ugu baaqay in ay tabisho sawirka wanaagsan ee ay ku aragtay shirka jaraa’id.

shirka jaraa’id ayaa yimid kadib 2 saac markii ay heshiis ka koobnaa dhow qodob ay kala saxiixdeen Dowladda Itoobiya iyo Midowga Jabhadda Xoreynta Somaaligalbeed (UWSLF),waxaa xusid mudan in Ururka UWSLF uu dagaal mudo 18 sano ah kula jiray Dowladda Itoobiya ,waxayna Xubnaha Ururkaasi mar sii horeysay sheegeen in ay wadada ay hada qaateen ay ku timid dadkooda oo baa’ba qarka u saaran marka laga fiiriyo Diintooda , dalkooda iyo dadnimadooda iyo Jahliga sii baahaya ee deegaanka ka jira.

Faah Faahin Shirkii heshiiska Ururka UWSLF & Dowladda Itoobiya oo soo gaba gaboobay

Somalimirror — Thu, 29 Jul 2010 21:44:41 +0000

Hotelka Caalamiga ah ee Ghion ee Magalada Addis Ababa waxaa maanta si rasmi ah loogu soo gaba gabeeyay Shirkii saxiixa heshiiskii ay wada gaadheen Midowga Jabhadda Xoreynta Soomaaligalbeed(UWSLF) iyo Dowladda Itoobiya waxaana madashar shirkaa soo xaadiray Marti sharaf ka kala socotay Beesha Caalamka,Midowga Afrika ,Midowga Yurub ,Urur Goboleedka IGAD (daawo sawiradda)qaar ka mid ah Safaaradaha ku yaala Addis Ababa oo ay ka mid ahayd Safaaradda Dalka Sudan ee Itoobiya.

ugu horeyn waxaa shirka furay Dr Sheferow Tagla Mariam oo ah Wasiirka Arimaha Federalka Itoobiya wuxuuna halkaa ka sheegay in dhankooda aysan waxba ka hagran heshiiska iyo sidii uu u midha dhali lahaa sidoo kalena ay sameeyeen dadaalo dheeri ah oo ay ku doonayeen in UWSLF aysan marka dareemin gaabis iyo diiditaan la xidhiidha ajandayaasha ay Dowladda Itoobiya soo hor dhigeen,wuxuna intaa raaciyay in heshiiska maanta la kala saxiixday uu soo maray heerar kala duwan oo qaarkood ay aad u adkaayeen, wuxuuna nasiib wanaag ku tilmaamay talaabada taariikhiga ah ee uu qaatay Ururka UWSLF kaasoo uu ku tilmaamay in uu yahay Urur la soo jiray Dowlado kala duwan oo Itoobiya soo maray.

markii ay Sheekh Ibraahim Dheere iyo Dr Sheferow Tegla Mariam ay ka saxiixeen hesiiska isla markaana kala gudoomeen warqadaha waxaa hal mar ay dhamaan xubnaha UWSLF ee madasha joogayi ku dhawaaqeen “Alaahu Akbar . Alaahu Akbar” taas oo laga dheehan karo in uu jiro wada jir ka dhaxeeya Xubnnaha kala duwan ee UWSLF isla markaana ay ku raacsan yihiin Gudoomiyahooda heshiiska uu saxiisay

waxaaa sidoo kale shirka ka hadlay Sheekh Ibraahim Maxamed Xuseen wuxuuna ugu horeyn si guud uga hadlay xaaladihii kala duwanaa ee uu Ururku soo maray iyo mudadii uu dagaalka ku soo jiray ee 18 sano ahayd ,wuxuuna sheekhu xusay in ay wadadan qaateen kadib kulamo gaar u ahaa Ururka oo uu Ururku qaatay taasina ay keentay in maant la gadho heshiiskan oo ku yimid kulamo badnaa oo ay labada dhinac isku soo hor fadhisiteen intaa kadib waxa uu Sheekh Ibraahim Dheere tilmaamay in Jabahadda TPLF iyo UWSLF ay ahaayeen labo jabhadood oo dhinacyo badan isaga ekaa shucuubta ay labadaa jabhadood u dagaalamayeena loo geystay dhibaato dhinacyo badan taabaneysa ilaa haddana ay taasi ka muuqato goboladaa labada ah.

Sheekh Ibraahim waxa uu intaa ku daray in wax badan ay xooga saari doonaan hormarka gobolka ay ka soo jeedaan oo ah masuuliyadooda ugu weyn ee ay qaban doonaan marka laga soo tago nabad galyada iyo wacyi galinta qeybaha kala duwan ee bulshada, waxa uu intaa ku daray in uu si guud ugu faraxsan yahay in mas’uuliyiin kala duwan kalana matalaya Beesha Caalamka,Midowga Afrika ,Midowga Yurub ,Urur Goboleeda IGAD ,Hey’aadka Dowliga ah iyo kuwo Maxaliga ah iyo kuwa madaxa banaanba ka soo qeyb galka ay ka soo qeyb galeen shirka iyo saxiixa heshiiskaba .

intaa kadib waxaa hadal soo jeediyay Madaxweynaha Dowlada Deegaanka Soomaalidda Itoobiya Cabdi Maxamuud Cumar wuxuuan ugu horeyn tibaaxay in waxa ugu horeeya ee ay ka shaqeynayaan ay tahay wax wadda qabsi iyo is kaashi mar hadii ay walalahood heshiiyeen waxa horyaalana ay tahay sidii gobolka looga saari lahaa dib u dhaca haysta loona hormarin lahaa, waxa uu intaa ku daray in wax badan ay ku baaqeen in ay nabad ula diyaar yihiin Ururka ONLF in uu nabadda qaato mar walbana ay ku cel celiyanaan arintaa wax walbana ay diyaar ka yihiin dhankooda iyagoon lahayn wax shuruud ah.

Ras’iiisal Wasaare ku xigeenka Itoobiya Abaye Sahay oo isna kulanka ka hadlay ayaa sheegay in uu aad ugu faraxsan yahay heshiiska maanta la saxiisay oo ku yimid doonitaan iyo is aaminaad rasmi ah oo ka timid labada dhinac arintaasina ay horseedayso in dalka Itoobiya uu noqdo meel xasiloon hormarna ku talaabsada waxa uu amaantay go’aanka ay qaateen Ururka UWLSF oo uu ku tilmaamay in uu yahay mid geesinimo xambaarsan taariikhdana ay xusi doonto.

intaa kadib waxaa hadalo koob kooban soo wada jeediyay Safiirka Dowladda Sudan u fadhiya Magaalada Addis Ababa Maxamed Yuusuf Xasan iyo Gereral Khaliif oo ahaa wakiilka uu maamulka Puntland ,waxayna Mas’uuliyiintaa sheegeen in ay garab taagan yihiin go’aanka ay wada qaateen UWSLF iyo Dowladda Itoobiya arintaasina ay tahay mid xasilooni u keeni doonta mustaqbalka xal u helidda mushkiladda dhabada dheeraatay ee ka jirta Geeska Afrika.

sidoo kale waxaa kulanka hadalo taagero ah ka soo jeediyay gaar ka mid ah Qurba jooga u dhashay Soomaligalbeed oo shirka ka qeyb galay waxayna dhamaantood sheegeen in wax badan ay filayeen in xal loo helo Muskilada iyo samata bixinta gobolka ay dagaanka dadka Reer Soomaligalbeed arintana ay horseedayso in gobolku uu la tartamo gobolada kale ee Itoobiya ,waxa ay carabaabeen in gobolka ay ka jirteen dhibaatooyin kala duwan oo ay Xukuumaddu ku haysay mudooyinkii la soo dhaafay balse intii ay waan waantu socotay is badal badan laga daareemay deeegaanka si guud.

shirka ayaa la soo gaba gabeeyay 12:20 Duhurnimo waana si rasmi ah u soo xidhay Wasiirka Arimaha Federalka Itoobiya Dr Sheferow Tegla Mariam wuxuuna tlmaamay in 2:30 galabnimo uu jiri doono shir Jaraa’id oo saxaafadda loogu faah faahin doono shirka iyo qaabka uu ku soo socday .

Halkan ka Daawo Sawirada oo dhan

shirkii saxiixa heshiika UWSLF & Itoobiya oo addis ababa toos uga socda

Somalimirror — Thu, 29 Jul 2010 11:11:46 +0000

Abaaaro 10:00 Subaxnimo ee maanta waxaa Hotelka Ghion ee Magaalada Addis Ababa si toos ah uga furmay Shirkii Saxiixa heshiiska Ururka UWSLF iyo Dowladda Itoobiya waxaana Shirka goob joog ah ahaa wufuud caalami ah oo ka kala yimid Daafaha Caalamka.

Shirka ayaa waxaa intii uu socday hadalo dheer dheer oo meelo badan taabanayay soo jeediyay Wasiirka Arimaha Federal ka Itoobiya Dr Shiferow Teqla Mariam ,Gudoomiyaha Ururka UWSL Sheekh Ibraahim Maxamed Xuseen iyo Madaxweynaha Dowlada Deegaanka Soomaalida Itoobiya.

Hadaladaa kadib waxa ay Dr Sheferow iyo Sheekh Ibraahim dheere is waydaarsadeen Warqadihii ay ku qoraayeen waxa ay ku heshiiyeen Dowladda Itoobiya iyo Ururka UWSLF.

Shirka ayaa lagu wadaa in uu si rasmi ah u soo gaba gaboobo galabnimada Maanta ah waxaana dib la isugu soo noqonayaa 2:30 galabnimo xiligaa oo la qaban doono Shir Saxaafadeed arintaa lagu faah faahinayo

Wixii warar ah ee shirkaa ka soo baxa dib ayaan idinka soo sheegi doonaa ilahay idankii

AU oo ciidamo kordhin go’aamisey, Al-shabab oo qaadacey & DKMG oo soo dhaweysay.

Somalimirror — Thu, 29 Jul 2010 08:31:16 +0000

Shirkii Ururka Midowga Afrika ee ka dhacey Dalka Uganda waxa lagu go’aamiyey 4000 oo askari oo dheeriya in lagu soo kordhiyo ciidamada AMISOM ee xilligan ku sugan Magaalada Muqdisho.

Go’aanka Ururka AU ee ciidamo kordhinta waxaa qaadacey Xarakada Shababul Mujaahidiin oo uu Hadley Afhayeenka Xarakada Sh Cali Maxamuud Raage, waxa uuna sheegay iney ka hortagayaan.

Afhayeenku shir jaraa’id oo shaley Saxaafada u qabtey waxa uu sidoo kale ka sheegay ciidamada AMISOM iney fashilmeen lana dagaalamaan iyaga iyo DKMG, go’aanka AU-da gaareyna uu yahey waxba kama jiraan aan hadal dhaafsiisneyn.

Balse DKMG ayaa dhinaceeda soo dhaweysay go’aanka ciidamo kordhinta ee Ururka Midowga Afrika ka soo baxey, waxa uuna go’aankan ku tilmaamey Afhayeenka Xukuumadu C/qaadrir Walaayo mid lagu hagaajinayo Xaalada amdni daro iyo dhibaato ee dalka ka taagan, siduu hadalka u dhigey.

Hadalada qaadacaada iyo soodhweynta isugu jira ee ka soo kala baxey Al-shabab iyo DKMG ayaa imaanaya maalin ka dib markii ururka AU-du go’aan ciidamo dheeriya oo ka kala imaanaya Dalka Guinea, Djibouti iyo kuwo aan la cayimin oo ka tirsan IGAD ka soo saarey shirkii ugu soo gebo geboobay Dalka Uganda.

Ciidamo dheeriya oo Soomaaliya loo soo diro lama filayo iney Xaalada qalafsan ee Dalka ka taagan wax ka bedelaan, balse waxaa loo toog hayaa iney uga sii darayaan dhibaatooyinka kale duwan ee Shacabka heysta.

Seddex kun oo qof oo si maalinle ah isu dila

SomaliMirror — Wed, 28 Jul 2010 15:02:04 +0000

Hay’adda caafimaadka adduunku waxay sheegtay inay maalin walba is daldalaan ilaa seddex kun oo qof, taas oo tirada sannadkii is disha ka dhigaysa hal milyan oo qof.

Tiro-koob ay hay’addu samaysay waxay sheegtay in 45kii sano ee ugu dambaysay is dilistu ay korortay 60%. Hay’addu waxay tiri: is dilku wuxuu ka mid yahay seddexda sababood ee dadka ugu badan u dhintaan gaar ahaan kuwa da’doodu u dhexayso 15-44 sano.

Xilliyadii hore is dilka waxaa ugu badnaan jirey ragga waaweyn, dhawaanse waxaa aas u soo kordhaya dhallinyarada is dilaysa ilaa ay noqdeen kuwa khatarta u badan haysato.

Hay’addu waxay kaloo sheegtay in dalalka Yurub iyo woqooyiga Amerika ay sababaha u badan ee is dilku yihiin is lahadalka, walwalka iyo jirrooyinka ka dhashay isticmaalka maandooriyeyaasha.

Waxaa xusid mudan in qofku is dilo inay tahay xaaraan, qofka ku kacana uu cadaab ku mutaysanayo iyo in aysan dhibaatadaani haysan dadka muslimiinta ah ee Ilaahay ku xiran, cibaadadana ku dadaala ee ay tahay mushkilad ka timaada diin la’aanta iyo Alle ka fogaanshaha, loona baahanayahay inay muslimiintu diintooda u soo noqdaan; si aysan u haleelin mushkiladaha ay ummadaha kale la il-daran yihiin. Sidoo kale ay aadanaha kale ugu baaqaan xaqa Ilaahay iyaga ku sharfay oo ah diinta islaamka.

Waayeel muslim ah oo ay dhallinyaro gaalo ah ku dileen masjidka hortiisa

SomaliMirror — Wed, 28 Jul 2010 13:53:03 +0000

Laba inan oo Ingiriis ah oo caado ka dhigtay inay ku xadgudbaan dadka muslimiinta ah ee waayeelka ah ayaa waxay ku dileen masjid ku yaal magaalada London hortiisa oday 67 sano jir ah oo muslim ah oo ay wehelisey gabar 3 jir ah oo uu awoowe u yahay.

Kaameerooyinka ilaalada ayaa soo bandhigay muuqaalka xadgudubkii waxshiga ahaa ee ay inamadaasi ku sameeyeen muslimka waayeelka ah, taas oo ay ka muuqatey inay ku raaxaysanayeen dhibaatada ay u gaysanayeen odayga waayeelka ah oo ay ku horgaraaceen ilmaha uu awoowaha u yahay ilaa uu u dhintay dhaawacyadii ka soo gaaray.

Inamadan ayaa waqti yar ka hor waxay ku weerareen nin iyo xaaskiis oo muslimiin ah masjid kale horti. Maxakamaddu waxay ku xukuntay wiilasha midkood oo 15 jir ah afar sano iyo bar. Halka kan kale oo 14 jir ah ay ku xukuntay seddex sano iyo bar. Wiilashaan oo caadaystay falalkaan xadgudubkaa markii xukunku ku dhacay ma aanay muujin wax shallayto iyo ka xumaansho ah midna.

Waxaa kaloo inamadaan lagu qabtay xadgudubyo badan oo ay ku sameeyeen dad muslimiin ah oo waayeel ah oo ay ku sawireen kaameerada mobile-ladooda; si ay ugu faanaan dhallinyarada saaxiibbadood ah.

Muslimiinta Ingiriiska ayaa aad iyo aad uga xumaaday xadgudubyada noocaan ah ee loo gaysanayo muslimiinta waayeelkaa oo waliba lagu raaxaysanayo, la isuguna faanayo.

Waxaa xusid mudan inay dowladaha reer galbeedka iyo qalabkooda warbaahintuba caadaysteen colaadinta muslimiinta iyo in shucuubta gaalada ah lagu kiciyo ilaa arrintu ay gaartay in ubadkoodii har cad ay ku laayaan waayeel biri-magaydo ah, taas oo ka turjumaysa colaadda iyo cuqdadaha islaamka iyo muslimiinta looga qabo guryaha ay ubadkaasi ka soo tooseen iyo iskuulada ay wax ka bartaan.