Kulankii macaahidda shareecada oo maalintii 2aad galay

Published on June 27, 2011 by SomaliMirror   ·   2 Comments   ·  

Waxaa saaka 8:00 subaxnimo dib u furmay kualankii aqoon isweydaarsiga ahaa ee macaahidda shareecada,kulanka qaybtiisii hore waxaa warbixno laga dhageystay macaahid ay ka mid yihiin: machadka iqra ee magaalada badhan,machadka faaruuq ee buuhoodle,machadka ibnu xajar ee boosaaso,machadka khadiija ee qardho, machadka al-huda ee garoowe,machadka faaruuq ee gaalkacyo,iyo kulliyadda shreecada ee jaamacadda bariga afrika oo warbixin waafi ah ka soo gudbisay macaahidda shareecada ee hoosyimaada jaamacadda oo gaaraya ilaa 12 machad.

Qaybtii labaad ee kulankii galinka hore waxaa fikrad kooban oo ku saabsan manaahijta ka soo jeediyay ustaad axmad cabdi, ka dibna waxaa ka soo qaybgalayaashu ay dood dheer ka yeesheen sidii loo mideyn lahaa manaahijta macaahidda, sanadaha wax barashada,saacadaha diraasada iyo heerarka shahaadooyinka ay bixyaan, ka dib markii arrimahaas si fiican loo falanqeeyay wuxuu shirku arrintaas u saaray guddi ka kooban ilaa 8 xubnood oo laga codsaday in ay is barbar dhigaan muqarraraatka macaahiddu dhigaan ka dibna ay ka soo xulaan muqar ay is leeyihiin waa midka ugu habboon ee ay macaahiddu qaadan karaan.

Salaaddii casar ka dib ayaa mar labaad la isugu soo noqday hoolkii shirarka sidii qorshuhu ahaa waxaana muxaadaro cinwaankeedu yahay مناهج التغيير الإصلاح  soo jeediyay sh. Bashiir axmad salaad, wuxuuna sheekhu si kooban uga hadlay soo bixitaankii baraarugga islaamiga ah ee cusub iyo sababihii keenay iyo qaababka ay islaamiyiintu ugu kala howlgaleen islaaxinta xaaladda muslimiinta.

Sheekhu wuxuu sheegay in islaaxintu ay soo martay qaabab kala goonigooni ah sida in xoogga la saaro dhinaca aqoonta kaliya siday ay sameeyeen culimadii reer aljeeriya,in xoogga la saaro la dagaallanka gumeysigii ku soo duulay dhulalka muslimiinta sida ka dhacday liibiya marooko iyo meelo kaleba,ka dibna waxaa billowday marxalad cusub oo lagu sheegi karo islaax shaamil ah wuxuuna tusaale ka dhigay sheekhu dacwadii sh. Maxamad c/wahaab,dacwadii badiic al- samaan al- nawrasi ee turkiya,jamaacada ansaaru sunnah ee masar iyo suudaan,iyo jamaacada al- ikhwaan al-muslimuun.

Sheekhu wuxuu ku nuuxnuuxsaday in dadka isbaddlka iyo islaaxa ka shaqeeyay ay isku waafaqsanyihiin in muslimiinta wax ka khaldameen loona baahanyahay in wixii khaldamay la saxo,wuxuuna tilmaamay in waxa la isku qabtay  uu yahay qiimeynta heerka khaladka dhacay taasina waxay keentay in qolaba ay meel xoogga saarto sida in xoogga la saaro xukunka iyo siyaasadda,oo qolaoba si u waajahday sida in baarlamaanka la galo,in xoog la adeegsado, iyo in kaalmo laga codsado qabaa’ilka ama awoodaha kale ee jira sida xibu taxriir ay yeeleen.

Sheekhu wuxuu tilmaamay in dadka qaar ay ku howl galeen in kor wax laga soo saxo qaar kalena ay xoogga saareen in dadka si qof qof ah loo saxo , wuxuuna sheegay in sida saxani ay tahay in islaaxa kor iyo hoosba looga baahanyahay.

Gabagabadii wuxuu sheekhu soo bandhigay tiirarka loo baahanyahay in uu ku taaganyahay manhajka islaaxinta iyo wax baddaliddu wuxuuna ku soo koobay qodobadan:

1. In aragti cad laga haysto deegaanka iyo bii’ada laga howlgalayo marka soomaalida laga hadlayana wuxuu sheekhu xusay in ay lama huraan tahay in lagu howl galo in bulshada soomaaliyeed ay tahay bulsho muslim ah.
2. In fikrad cad laga haysto asaaska mushkiladda muslimiinta maanta haysata waana in la garwaaqsadaa in ay muslimiintu sabab u yihiin dhibka maanta haysta.
3. In ujeedadu ( hadafku ) caddahay waana in ay tahay in dadka ilaahay addoommo looga dhigo.
4. In aragti cad laga haysto waajibka la qabanayo,waana inuu noqdo in dadka ilaahay loogu yeero iyo in wakhti walba waajibka yaalla la qabto
5. Waa in aragti cad laga haystaa yoolka ugu danbeeya ee loo socdo waana inuu yahay raalli galinta ilaahay.
6. Waa in aragti cad laga haystaa qaabka iyo habka loo howl galayo tabaha la adeegsanayo oo ku jaan go’an marba awoodda la heli karo.
7. Waa in aragti cad laga haysto saqafka wakhti  eexadeynaya shaqada la hayo waana in la ogsoonaado  in waajibku uu yahay in camalka la joogteeyo oo aan la daddagin.
8. Waa in aragti cad laga haystaa cidda loo noqonayo( marjiciya) waana in ay yihiin dadka ahlu cilmiga ah oo aan lagu xaddideynin culimada koox gaar ah ee loo baahanyahay in cid walba oo culimo ah la talo galiyo lana dhageysto isku koox aad ahaataan ama aad kala koox ahaataane.

Ka dib markiii sheekhu muxaadaradadiisii so gabagabeeyay waxaa tacliiqaad wax ku ool ah soo jeediyay sh.cali warsame,sh. c/Qaadir nuur, Dr. axmad x. c/raxmaan,iyo sh. c/naasir x. axmad, culimaduna waxay si fiican uga doodeen qaybo ka mid ah hadalkii sheikh bashiir soo jediyay waxayna culimadu isku raacraaceen in caddaalad loo baahanyahay markii la qiimeynayo dadka ku howllan islaaxinta xaaladda muslimiinta.

No related posts.