Anigu waxaan dalalka reer galbeedka ku noolaa 22 sano ka badan, maalin maalmaha ka mid ah ayaa gaari aan watay waxaa soo raacay nin Gaal ah oo reer North America u dhashay, sheeko gaaban kadib waxaan u soo taagay kitaab Quraanka tafsiirkiisa ah oo Ingiriis ah. Intii uusan iga qaadin ayuu I waydiiyay waxa kitaabku yahay markaas ayaan ku iri waa Quraan ee akhri. Wuxuu iigu jawabay eray aan aad iyo aad ula yaabay walina aan qalbigayga ka go,in.

Wuxuu igu yiri iga fogee akhrin maayee, markaan sababta waydiiyay ayuu iigu jawaabay “Quraanku waa cudur lays qabadsiiyo”(Contagious Disease)ee iga fogee. Markaan waydiiyay waxa uu ula jeedo ayuu igu yiri qofkii akhriyaa waaa muslimayaa marka ma doonayo in aan akhriyo, waana sababtaas midda ninkaas jaahilka xaqa ka ahi u diiyay inuu Quraanka aqriyo isagoo ka baqaya in qalbiisa nuurka Ilaahay gaaro kadibna uu Rabigii abuuray rumeeyo. Waxaa laga yaabaa inuu TVga ka daawaday dad dhahaya Quraanka ayaan akhriyay kadibna Diinta Islaamka ayaan qaatay.

Waqtigaasi waxay ku dhawayd markii qaraxii New York dhacay waxaana arrintaas kadib soo kordhay dadka reer Europe ee Quraanka akhrinaya kadib marka ay ogaadaan fariinta xaqa ah ee Kitaabka Allaah xanbaarsanyahay iyo in wixii looga sheegi jiray ay been ahaayeenna xaqa rumaynaya.

Muslimiinta ayaa laga rabaa in ay dadka aan wali xaqu gaarin u qaybiyaan kitaabka Ilaahay si ay u ogaadaan ujeedadii loo abuuray iyo xaqiiqada fariinta uu kitaabka Ilaahay xanbaarsanyahay.