SomaliMirror

Nadwadii ka soctay Masjidka  Al-Huddaa ee magaalada Laascaanood ayaa caawa la soo gaba gabeeyay waxaana xaflada gaba gabeynt Nadwada  ka soo qeyb galay Culimaa’udiin , Nabadoono iyo Garaado , waxaana ugu horeyn Xaflada lagu furay Aayaad Quraan ah waxaana kadib kalmad la siiyay Sheekh C/naasir Xaaji Axmed oo ka mid ah Culimada Reer Laascaanood.

Sheekh Cabdinaasir Xaaji Axmed uu ugu horeyn u mahad celiyay Culimadii Nadwada Duruuska ka soo jeedisay wuxuuna xusay in Mowduucyo kala duwan ay Culimadu ka hadleen waxa laga doonayaa dadka reer Laascaanood-na  ay tahay in ay dabaqaan wixii ay Culimadu u sheegtay , wuxuuna dhinaca kale wax ka tilmaamay dadaalka xaga dacwada ah ee ka jira Gobolka.

Inta kadib waxaa kalmad la siiyay Dr Bashiir Axmed Salaad  wuxuuna ugu horey Dr Bashiir u mahad celiyay dadka Reer Laascaanood oo uu ku tilmaamay in ay yihiin dad diin jecel wanaaganaka shaqeeya , wuxuuna ugu baaqay in ay ka shaqeeyaan arimaha diinta iyo islaaxa bulshada sidoo kalena ay ka fogaadaan wixii dhibaato u keenaya Diinta , Dalka iyo wada noolaanshahooda guud .

Dr Bashiir waxa uu tilmamay in mar walba bulshada looga baahan yahay in ay Culimada ixtiraamto dadka ahlu cilmiga ahna aysan xumeyn waxna aysan ka sheegin hadii ay arimtaas ka dhowrsadaan ay noqonayaan kuwo jidka alle ku hanuna  , wuxuuna Dr Bashiir ugu dambeyntii dadka Reer Lascaanood Ilaahay ugu baryay in uu kheyrka faafajiyo xumaanta iyo dhibkana ka dulqaado .

Inta kadib waxaa kalmad kooban la siiyay gudoomiyaha Jaamacada Nugaal ee Magaalada Laascaanood C/risaaq Lafoole , wuxuuna  Gudoomiyhu ugu horeyn uu u mahad celiyay gudiga qaban qabaada Nadwada iyo sidoo kale shirkada Isgaadhsiitna iyo Bahda warbaahinta oo uu ku tilmaamay in ay kheryka Masjidka ka socda gaadhsiiyeen meelo kala duwan oo aduunka ka mid ah .

Waxaa sidoo kale kalmad koban la siiyay qaar ka mid ah Nabadoonada iyo Cuqaashada Gobolka waxayna tixabeen in culimadu aysan magaalada Marti ku ahayn ee dadka deegaanku ay culimada marti uga yihiin cilmiga ay xambaarsan yihiin  culimadana ay soo gudbiyeen Diin iyo Cilmi, cilmiga ay soo gubeen ee waajibka ku ahaana ay iska rideen waxa uu waajibka  uu ku yahay  uu yahay dadka ku dhaqan Laascaanood .

Waxaa iyadan kalmado la kala siiyay Saleebaan cali Daahir oo matalayay walaalaha Red Sea  ee ku dhaqan Dalka Denmark oo nadwada ka qeyb qaatay  iyo Abwaan Maxamed oo tiriyay tix gabay ah oo uu ku cabiranyo nadwada iyo sidii ay u dhacday , waxyaabihii ay culimadu uga hadashay iyo waxa laga faa’iiday intaba

Sidoo kale kalmad la siiyay Xaaji Cabdi Cali “Baradho “ oo ku hadlayay magaca Jaaliyada Dibada wuxuuna Xaaji Cabdi Barasdho uu xusay in uu sanadkii 1990 uu ka tagay dalka markii uu ka tagay dalka kadib uu ka dagay magaalada New York  maalmo kadibka uu uga sii gudbay Dalka Canada wixii intaa kadeeyayna uu ku nolaa magaalooyinka Toronto iyo Ottawa , wuxuuna Xaaji Barasdho aad u amanaay Sheekh Bashiir Shiil oo uu ku timaamay in uu laf dhabar u yahay Dacwada ka jirta Canada , sidoo kalena uu Sheekh Bashiir Shiil u istaagay in uu dadka Dacwada gaadhsiiyo.

Waxaa intaa kadib kalmad la siiyay Gudoomiyaha Gudiga qaban qaabada Nadwada Sheekh Axmed Maxamed Suleymaan  wuxuuna Sheekhu xusay in uu Ilaahay uga mahdinayo qabsoomida ay nadwda u qabsoontay wuxuuna cudur daar ka bixiyay khadadkii xaga Taleefanada ee Gobolada wuxuuna dhinaca  mahad celiyay Shirkada Isgaadhisiinta ee kala ah :- Africa Online , Telesom iyo Telcom  iyo warbaahina kala duwan wuxuuna si gaar , wuxuuna Sheekh Axmed ugu dambeyntii Ilaahay ka baryay in uu kheyrka waafajiyo dadka  ummadda Muslimiinta ahna uu u dambi dhaafo.

Ugu dambeytii waxaa hadalka xidhitaanka Nadwada la siiyay Garaad Jaamac Garaad Islaamciil oo dhawaan lagu caleemo saaray Magaalada wuxuuna Garaadku codsaday in Culimada ay Ilaahay u baryaan in uu ku guuleeyo Xilka loo wakiishay , sidoo kale waxa uu Garaad Jaamac Garaad Ismaaciil uu sheegay in Culiamda Nadwada ka qeyb qaadanaysa ay ka kala yimaadeen gobolo kala duwan oo Soomaaliya ka mid ah wakhtigooda  qaaliga ahna ay u soo hureen in ay dadka Reer Laascaanood kheyrka gaadhisiiyaan baraarujiyaana , wuxuuna sidoo kale Garaad Jaamac dadka ugu baaqay in ay Culimada ixtiraamaan kana dambeeyan cilmigana ay ka qaataan ayna noqdaan Bulsho ku xidhan Culimada.

Nadwada ayaa lagu so gaba gabeyay Duco Garaad Jaamac Garaad Ismaaciil iyo mid caam ah waxaana dadka u duceeyay Sheekh Cali warsame , ugu horeyn Sheekh Cali Warsame waxa uu u duceeyay Garaad Jaamac Garaad Ismaaciil oo uu Ilaahay ugu baryay in uu ku guuleeyo xilka loo wakiishay Ilaahayna uu towfiiqda waafajiyo , wuxuuna Garaadka kula dardaarmay in mar walba uu cabsida Ilaahay laasimo wax walbana uu diinta u eego waxa ay qabto, intaa  kadib Sheekh Cali Warsame waxa uu si caam ah ugu duceyay Umadda Muslimka ah gaar ahaan tan Soomaaliyeed oo u Ilaahay uga baryay in uu ka dulqaado dhibaatada iyo dagaalada heysta .

Nadwada caawa la soo gaba gabeyay ayaa ah nadwadii labaad ee lagu qabto Magaalada Laascaanood waxayna nadwadani noqoneysaa tii ugu horeysay ee nooceeda ah ee si toos ah “live” loogala socdo aduunka.

Shabakadaha Somalimirror iyo Halgan ayaa ahaa kuwo isku howlay soo tabinta Nadwada si toos ah iyo sidoo kale cod , qoraal iyo sawirba ,waxayna shabkadana sidoo kale ka qeyb qaaten Nadwadii Bishii 4-aad ee sanadkan lagu qabtay Magaalada Boosaaso , Halka ay Hagan ay soo tabisay Nadooyin ka dhacay Magaalooyinka Hargeysa iyo Burco oo aysan Somalimirror fursad u helin.

 

 

 

 

www.somalimirror.com

 Daabaco