SomaliMirror

Jariiradda “Daral Al-Hayat” ee ka soo baxda Dalka Sacuudi Carabiya ayaa Arbacadii la soo dhaafay ee ay Taariikhud ku beegnayd 10 June 2009 soo daabacday Warbixin sir ah oo ay ka heshay Midowga Afrika oo ku saabsan Xaaladda DKMG ah iyo guud ahaan Soomaaliya.

Jariiradda Daral Al-Hayat ayaa tiri “Waxaa lagu sheegay Warbixin sir ah oo uu soo saaray Midowga Afrika:- Xukuumadda Soomaaliya ee uu Hogaaminayo Sheekh Shariif Sheekh Axmed waxaa ka Buuxa Ceebo Fool xun wayna sii sakaraadaysaa(sii Dhimanaysaa) mana haysato Fursad ay ku guuleysato ama awood ay ku jabiso Mucaaradka Islaamiga ee Hubaysan ee Wacadka ku maray inay Afganbiyaan, warbixintan oo ay ay Nuqul ka mid ahi heshay Al-Xayaat waxaa kale oo lagu xusay in Shacbiyadda Madaxweyne Axmed ay wali tahay mid sii baaba’aysa Maalinba Maalinta ka danbeysa laga soo bilaabo xiligii loo doortay Madaxweynaha Soomaaliya Bilowgii Sanadkan, Taageeradda Qabiilkiisana kama difaaci karaan khatarta ku soo fool leh in kastoo uu Gurmad weydiistay uguna Baaqey Dhalinyaradooda inay ku soo biiraan Sufuufta Ciidamada Difaacaya Xukuumadiisa”.

Al-Xayaat “Warbixinta waxa kale oo lagu sheegay in Qeyb ka mid ah Shacabka Soomaaliyeed ay wali rumaysanyihiin in Xukuumadda Axmed ay Dabo dhilif u tahay Q.M iyo Reer-galbeedka, waxayna dhahaan Shaqsiyaadka ay soo diyaarsadeen Reer-galbeedka iyo Q.M si ay u Hogaamiyaan Soomaaliya kama suulin inay ka shaqeynayaan Maslaxadooda Shaqsiyadeed iyo Mida Qabiilkooda”.

“Macluumaadkan ayaa yimid xili ay Shir Deg Deg ahi ku yeesheen Ergadda Midowga Afrika u qaabilsan Soomaaliya Caasimadda Kenya ee Nairobi iyo Mas’uuliyiin ka mid ah Q.M, iyo Safiiradda Midowga Afrika u jooga Kenya, waxaana goob joog ka ahaa Wasiirka Gaashaandhiga Soomaaliya Max’ed Cabdi Gandi, ujeedka shirkuna wuxuu ahaa in la falanqeeyo xaaladda cakiran ee ay xiligani marayso Soomaaliya” ayay tiri Jariiradda “Daral Al-Hayat”.

Sidoo kale Warbixinta Midowga Afrika waxaa lagu yiri “Xukuumadda KMG ah ee Soomaaliya kama aysan suulin in ay wali ku jirto Xaalad Sakaraatul Mowd ah gabi ahaanteedba, waxayna ku dhaliileen inaysan xiriir dhab ah la sameynin Mucaaradka, waxay isku dayaysaa inay u yeerato Dagaalyahano iyo Jihaadiyiin Ducafa ah, mana jirto wax Niyad dhab ah oo ay labadooduba ka leeyihiin ka miro Dhalinta Xukun Dhab ah iyo waliba Hanashadda Xaaladda Amaan midna”, wuxuuna intaa ku daray “Xukuumadda KMG ah ee Federaalka ah waxay kasbatay Ceebo Fool xun, mana haysato Fursad ay ku guuleysato, jiritaankeedu waa Wakhti dhumis Qorshayaal kalana ma lahan”.

“Shaki kuma jiro in Midowga Afrika ee ka Taageera Xukuumadda xagga Ciidanka iyo Siyaasada uu ka hayo Xukuumadda Soomaaliya Macluumaad badan oo run ka dhigaya Runimadda Warbixintan, laakiin Wasiirka Warfaafinta Soomaaliya Farxaan Cali Maxamuud ayaa si kulul u difaacay in Xukuumadu ay Qarka u saarantahay inay bur-burto, mar ay Al-Xayaat khadka Taleefanka kula xiriirtay isaga oo jooga Muqdisho ayaa waxa uu yiri “Anagu si aad ah ayaan uga Awood badanahay sidii aan ahayn Bilooyin ka hor, Tiradda Ciidamadayadda waxay kor u dhaafayaan xiligan 5 kun oo askari, anaga ayaana weerar ah halka qolyaha kale ay difaac yihiin, ayna sii jabayaan halka anagu aan gaarnay Guulo xagga Milatariga ah, Wada hadalkayaga ku aadan Mucaaradkuna waa mid aan ku doonayno Nabad, wuuna ka gaabsaday inuu faah faahin ka bixiyo Warbixinta Midowga Afrika” ayay Tiri Jariiradda “Daral Al-Hayat”.

Waxa kale oo lagu yiri warbixinta “Maamulka cusub ee Maraykanka wuxuu Doorbiday inuu sii wado Siyaasadihii Madaxweynihii hore ee Gorge Bush ee ahayd adeegsiga Hogaamiye Kooxeedyadda Taas oo ay uu ku fashilmay, waxayna mar labaad soo celinaysaa Fashilkii horey ula soo darsay Siyaasadda Arimaha Dibadda Maraykanka.

Warbixinta oo ka koobnay 5 Bog ayaa waxay Daboolka ka qaadeysaa in Sheekh Shariif uu isku dayay Bishii la soo dhaafay sidii uu uga heli lahaa Qabiilkiisa Taageero Ciidan iyo Mid Dhaqaale, taasna waxay ahayd xiligii ay Dagaaladii ugu danbeeyay ka socdeen Muqdisho ka dib markii uu Taageero Dhaqaale ka helay Dowlado ka mid ah Reer-Galbeed.

Tiradda Ciidamada DKMG ah ayaa lagu xusay Warbixinta “Ciidanka Milatariga iyo Booliiska ee Xukuumada Soomaaliya kama badna 1000 illaa iyo 1500 oo Askari, Dhamaantoodna waa Maleeshiyooyin ay leeyihiin Hogaamiye Kooxeedyo iyo Shaqsiyaad ku ad-adag Xukuumadda” lamana sheegin Magacyadda Shakhsiyaadkaasi.

“Kaalmo kasto oo Muuqata oo ay Xukuumaddu ka hesho Reer-galbeedka iyo Q.M waxay kor u sii qaadaysaa Shacbiyadda Islaamiyiinta” ayaa lagu yiri warbixinta Midowga Afrika.

Warbixinta Midowga Afrika ee Al-Xayaat Halkan ka Akhriso

www.somalimirror.com

 Daabaco