Cumar C/rashiid oo Muqdisho soo gaarey.

Published on February 26, 2009 by Somalimirror · 40 Comments ·

Cumar C/rashiid Cali Sharmaake oo dhawaan uu Sheekh Shariif u Magacaabay Ra’isul wasaaraha DKMG ah ayaa markii ugu horeysay ka soo dagay Garoonka Caalamiga ah ee Muqdisho.(Daawo Sawirada)

Cumar ayaa la sheegayaa in ay la socdaan Wafdi gaaraya 45 xubnood oo isugu jira Wasiiro ka mid ah Xukuumadiisa iyo qaar ka mid ah Xildhibaanada DKMG ah.

Waxaa garoonka ku soo dhaweeyay Cumar C/rashiid xubno ka tirsan DKMG ah oo isugu jira Golayaasha Baarlamaanka iyo Xukuumada oo uu ka mid yahey C/raxmaan Janaqow., sidoo kale waxaa ka mid ah dadkii soo dhaweeyay Xubno ka mid ah Maamulka Gobolka Banaadir.

Ka dib muddo kooban oo uu ku nastey qolka nasashada ee Garoonka, waxa uu la Hadley Saxaafada, waxa uuna uga warbixiyay qorshaha DKMG ah waxa uuna yiri:“Sidaad ogsoon tihiin shirkii Djibouti waxaa ka dhalatey Dowlad uu Madaxweyne ka yahey Shariif Sh Axmed, haatanna waxaa ila socda Golihii wasiirada badankooda, Dowladaas waxaa loogu talo galey 2 sano gudahood wadanka inay ku gaarsiiso Doorasho xor ah, hadafkeeda ugu weyn waxa weeye dibu heshiisiinta, in amniga la sugo in umadii qaxdey dib loo soo dajiyo guryahoodii iyo in haykalkii dowlad nimo la dhiso, waxaa naga go’an inaan karaamadii iyo qaranimadii soo celino”.

Sidoo kale baaq ayuu u direy Bulshada oo ugu baaqey inay nabada ka shaqeeyaan, hadii in muddo ah dhibaatooyin badan lagu soo jirey.

Waxaa Garoonka looga galbiyay oo lagu qaadey gaari ay leeyihiin Ciidamada AMISOM, kuwaas oo si gaar ah amaankiisa u sugayey, sidoo kale waxaa la socdey oo Diyaarada kala soo degay Ilaalo gaar ah oo la socotey oo Djibouti ka soo raacdey.

Si rasmiga ah looma oga halka la dajiyay basle wararka qaar ee aanu heleyno ayaa sheegaya in Madaxtooyada loo galbiyey.

Ciidamada AMISOM oo ku qalabaysan Hubka noocyadiisa kala duwan iyo kuwa DKMG ah ayaa si weyn u adkeeyay Amaanka wafdigaasi ka dib markii ay ka soo dageen Garoonka Caalamiga ah ee Muqdisho.