Sh. Shariif oo ku guuleystay Madaxweyninimada DKMG ah & Nuxurka Khudbadiisa.

Published on January 31, 2009 by Somalimirror · 35 Comments ·

Sheekh Shariif Sheekh Axmed ayaa ku guuleystay Markii ugu horeysay Doorashada Madaxweynaha DKMG ah Mudada 2-da sano ee soo socota.(Daawo Sawirada)

Sheekh Shariif ayaa ku soo baxayWareegii 2-aad ee Doorashada Madaxweynaha oo bilaabatay 01:00 Saqdhexe xiliga Dalka Djibouti oo ay isugu soo hareen isaga oo helay 293 Xubnood iyo Maslax Maxamed Siyaad Barre oo helay126 Xubnood.

04:33 Saqdii dhexe xiliga lagu dhawaaqey in Sheekh Shariif uu helay 293 waxaa qeybo badan oo ka mid ah Degmooyinka Muqdisho laga maqlay Rasaas iyo Madaafiic u muuqatay mid loogu Dabaal dagaydo Guusha Sheekh Shariif Sheekh Axmed.

2 warqadood ayuu sheegay Aadan Madoobe in ay Halowday oo aan loo isticmaalin sidii loogu talo galay.

Dhismaha Xukuumada Cusub

Sheekh Shariif oo Guushiisa ka dib Kalimad gaaban ka hor jeediyay Baarlamaanka isku dhafka ah ayaa ugu horeyba sheegay in uu sida ugu Dhakhsaha badan u soo Magacaabayo Ra’isul Wasaaraha Xukuumadiisa isla markaana uu soo magacaabayo Ra’isul Wasaare Tayo Awoodna u leh in uu qabato waxa laga doonayo.

Xoogaga Muqaawamada

Sheekh Shariif ayaa sheegay in uu Dadaal u gali doono daminta Colaada ka jirta Soomaaliya, wuxuuna ugu Baaqey xoogaga Muqaawamada ee ka soo horjeeda Heshiiska iyo Natiijada ka soo baxday inay ku soo biiraan, wuxuuna yiri”Waxaan rabaa inaan idinkugu Bishaareeyo sidoo kale Colaada ka jirta Dalka Soomaaliya inaan Dadaal ugali doono insha allaah, Dhamaan Walaalaheena ka soo horjeeda ee Hubka sida ee ka soo horjeeda Proceskan waxaan leenahay ku soo biira waa Walaalihiina Gacmaha ayaan idiin taagaynaa ku soo dhawaada”.

Dowladaha Dariska

Sidoo kale waxaa uu ka hadlay qaabka uu ula dhaqmayo Dowladaha Dariska ah waxaana uu yiri”Sidaas oo kale Dowladaha Dariska na la ah waxaan leenahay waxaan diyaar u nahay Bariga Afrika oo aamin ah oo daris ah oo ay u dhaxeyso iskaashi iyo wax wada qabsi iyo is-ixtiraam”.

Beesha Caalamka

Sheekh Shariif ayaa sidoo kale ka hadlay Beesha Caalamka iyo siday ula dhaqmeyso Shacabka Soomaaliya waxaana uu yiri”sidaas oo kale Caalamka waxaan rabaa inaan u sheego Somaliya Meel Caalamka looga Duulo ma aha, waxaa Degan Dad Masaakiin ah oo Dhibaateysan oo Nabad Naftooda u raadinaya”.

Fahamka Diinta

Sheekh Shariif ayaa si kulul uga hadlay Fahamka Diinta islaamka waxaana uu yiri”waxaan ku dadaali doonaan Insha Allaah, Fahamka Qaldan ama Tarjumaada Qaldan ee Islaamka laga bixiyay in si sax ah ay u dhacdo Insha Allaah”.

Mustaqbalka Dowlada

“insha allaahu Dowladan waxay hor-seedi doontaa Nabad waarta oo ka dhacda Geeska Afrika gaar ahaan Soomaaliya” ayuu yiri Sheekh Shariif.

Isku dhafka Baarlamaanka

Sidoo kale Sheekh Shariif ayaa Balan qaaday in Baarlamaanka ay isku darsadeen Isbahaysigooda iyo DKMG ah aan lagu sameyn wax kala sooc ah isaga oo arintaasi ka hadlayana waxa uu yir”Waxaan idiin balan qaadayaa insha allaah, Maadaama Baarlamaankii la mideeyay in Sida loo mideeyay ay ahaadaan oo wax kala sooc la yiraahdo aysan ka dhex dhicin Baarlamaanka Dhexdiisa Cid la arkana la siiyo Ahmiyada iyo Xuquuqda ay leedahay Insha Allaah”.

La Dagaalanka Musuq-Maasuqa

“Waxaan dhici doonin Insha Allaah Awood Maroorsi, waxaan Dhici doonin insha allaah Musuq-maasuq, Waxaan dhici doonin insha allaah in laga gaabiyo Mas’uuliyada Dusheena Saaran”.ayuu yiri Sheekh Shariif.

Rajada Sh. Shariif

Sheekh Shariif ayaa sidoo kale u rajeeyay Umadda Soomaaliyeed Nabad iyo Midnimo”ugu Danbeyntii ilaahay SW waxaan ka baryayaa Umadda Soomaaliyeed in uu Nabad u keeno Midnimadoodiina soo celiyo, Barwaaqo iyo horumarna gaarsiiyo, Dhibaatadeena Insha Allaah tii soo gabo gabowdo oo soo gabo gabeysa Dowladaan ilaahay ka dhigo, Dowlada soo socotana aad ku dooratiin Insha Allaah Dalka Dhexdiisa”.

Hanbalyada Maslax Siyaad Barre

Maslax Maxamed Siyaad Barre ayaa u hanbalyeeyay Guusha Sheekh Shariif waxaana uu yiri “”Madaxweynaha Sheekh Shariif Waan u hanbalyaynayaa sida uu ku guulaystay waadna mahadsantihiin”

Xaflada Caleema Saarka

Gudiga Doorashada ayaa sheegay in Xaflada Caleema Saarka Madaxweynaha Cusub ay ka dhici doonto Barito oo Sabti ah Taariikhdu markay tahay 31-/01/2009 Hotel Kempsink ee Magaalada Muqdisho.

Dhanka kale Milatariga Dalka Djibouti ayaa diyaariynaya isla Caawaba Taandho weyn oo la sheegay in loogu talo galay in lagu qabto Xaflada Caleemo Saarka Madaxweynaha halkaasi ka soo baxaya.

Sheekh Shariif Sheekh Axmed waxa hor yaala Caqabado fara badan oo dhanka Siyaasada iyo Amaanka la xiriira.