Nuur Cadde oo kulankii Sanca Ciidamo ku dalbadey

Published on December 31, 2008 by Somalimirror   ·   3 Comments   ·  

Nuur Cadde oo ka qeyb galey kulanka wadamada la isku yidhaahdo, kulanka Sanca oo ka dhacey dalka Suudaan, magaalo madaxdiisa Khartuum ayaa ka codsadey madaxdii ka soo qeyb gashey, Soomaaliya inay u soo diraan ciidamo nabad ilaalineed.

Waxa uu sidoo kale ka codsadey inay Soomaaliya loo fidiyo kaalmo bani-aadanimo, iyo sidoo kale dowlada ku lugta leh arimaha Soomaalamiya inay ka dhaadhiciyaan sidii Siyaasadooda ku wajahan Soomaaliya wax uga badali lahaayeen, si xaalada cakiran ee jirta wax looga badelo.

Khudbadii uu ka jeediyay kulanka Khartuum ee ay wada lahaayeen wadamada la isku yiraahdo, kulanka Sanca oo ah kiisii 6aad, ayna tahey markii ugu horeysay oo uu ka qeyb galo, ayuu ka sheegay in uu aad uga xunyahey hadalkii dhawaan ka soo baxey Q.M, ee ahaa inaanyn ciidamo Soomaaliya u soo diraan xilligan u diyaarsaneyn.

Nuur Cadde, ayaa sheegay xilligan wadanka Soomaaliya in ayna ka jirin xaalad degenaasho oo aan la isku haleyn karo, ayna ku soo aadeyso iyada oo dowlada Itoobiyana sheegtay ciidamadeeda Soomaaliya kala baxeyso, arintaas oo keeni karta sida uu hadalka u dhigay, khalal amni, dhanka kale looga fadhiyo fulinta heshiiskii ka soo baxey shirkii dhawaan Jabuti ugu soo wada dhamaadey DKMG ah iyo Isbaheysiga Dibu Xoreynta Garabka Jabuti.

Nuur Cadde oo bixitaanka Itoobiya ka hadlaya ayaa yiri:”anagu go’aanka Itoobiya ciidamadeeda kula baxeyso waanu tixgelineynaa,balse xaalada jirta ee amni marka la fiiriyo waxaa si deg deg ah loogu baahanayo ciidamo nabad gelyo oo Soomaaliya loo sii diro, si khalal amni aanu u dhicin”.

Waxa uu rajo ka muujiyey, Itoobiya meel cidlo ah inaaney uga dhaqaaqeyn inta la helayo ciidamo booskeeda buuxiya, waxa uuna ka dalbadey Midowga Afrika iyo wadamada kaleba inay xoojiyaan ciidamada nabad ilaalineyd ee Soomaaliya hadda ku sugan.

Nuur Cadde oo ka hadlaya ciidamada dhankooda u diyaarsan amaba ay ku talo jiraan inay howl geliyaan ayaa yiri:”waxa ay xukuumadu howl gelin doontaa 5 ilaa 6 kun oo ah Ciidamado amaanka ka shaqeeya, kuwaas oo sidoo kale buuxinaya booska kuwa Itoobiya baneeyaan, iyaga oo gacan ka helaya kuwa AMISOM”.

Dhanka kale Dowlada Eritrean ayuu ku eedeeyay inay qeyb ka tahey mushkilada iyo degenaansha la’aanta Soomaaliya ka jirta, sidoo kalena inay hub siiso xoogaga ka soo horjeeda iyo dicaayaha lagu furayo heshiiskii ka soo baxey shirkii Jabuti.

Nuur cadde oo sii hadlaya ayaa intaa ku darey waxa ay ka sugayaan kulankani inuu yahey kaalmo la taaban karo oo Soomaaliya ay u fidiyaan dowlada ka qeyb galey kulanka Sanca, si xaalada degenaansho la’aaneed ee ka jirta Soomaaliya wax looga qabto si markaa lugaheeda ugu istaagto.

Iscasilaadii C/laahi yuusuf ayuu soo hadal qaadey, waxa kale oo uu heegay in afhayeenka Baarlamaanku arinta sii wadayo inta laga soo dooranayo Madaxweyne beleda C/laahi Yuusuf sida uu hadalka u dhigay.

Heshiiskii Jabutii iyo qodobadii ka soo baxey ayuu dhanka soo hadal qaadey, wuxuuna si gaar ah u tilmaamey xubnaha Baarlamaanka cusub ka mid noqonaya ee Isbaheysiga dibu Xoreynta Garabka Jabuti loogu darey ee gaaraya 275 xubnood, ka dibna 550 xubnood ee Barlamaanku ka kooban yahey ay soo dooran doonaan Madaxweyne iyo Afhayeen Baalamaan, ka dibna la soo dhisi doono Dowlad midnimo qaran ah sida uu hadalka u dhigay.

Related posts:

1. Nuur Cadde & Sh. Shariif oo si wada jir ah u dalbadey.Ciidamo Soomaaliya la keeno
2. Nuur Cadde & Sh Shariif oo si wada jir ah ciidamo shisheeye u dalbadey.
3. Kulankii ugu horeeyay oo Xukuumada Nuur Cadde yeelatey
4. Nuur Cadde oo soo Gaaray Muqdisho
5. Nuur Cadde oo Nairobi kulan kula leh qaar ka mid ah Xubnaha Baarlamaanka