SomaliMirror

Shabakadda Somalimirror waxa ay idiin soo gudbinaysaa Qeybtii 2-aad waraysi dheer oo aan la yeelanay Xoghayaha Warfaafinta Isbahaysiga dib u Xoreynta Soomaaliya Axmed Cabdullahi Sheekh Maxamed oo ku sugan magaalada Djibouti.

Axmed Cabdullahi waxaanu ka waraysanay:-

B) Arinta xil ka qaadista ay sameeyeen garabka Isbahaysiga ee AsmaraT) Shirkii sanca iyo waxyaabihii ka soo baxay

J) Khilaafka Isbahaysiga iyo saameyntiisa

X) Iyo sida uu u arko xalka Soomaaliya waraysigan oo aad u dheeraa ayaan u kala qaybinnay labo qeybood, qeybta koowaadna waxay u dhacday sidatan soo socota:-

Waraysiga Qeybta labaadna waxa uu u dhacay sida tan:-

Qeybta 2-aad

SomaliMirror:- Asal ahaan maxaa keenay Khilaafka Isbahaysiga?

Jawaab:- Isfaham la’aan ayuu ku saleysan yahey, isfaham la’aantii uu ku saleynaa sancaa la geeyay waxey aheydna diirkaa laga qaadey oo waa laga doodey, markii laga doodeyna waa la daaweeyey.marka waxaan is leeyahey intaas bay aheyd in ay ku filaato dacwo iyo daawaba.

SomaliMirror:- Ma ku talo gashantihiin in mar kale aad dib isugu keentaan Isbahaysiga Dib u xoreynta ee ku kala jabay heshiiskii Djibouti?

Jawaab:- Run ahaantii wanaaga iyo wada shaqeynta iyo walaltinimada, mar kastaba waa la doonayaa oo Soomaali oo dhan baa la doonayaa in ay isu timaado dhibka heysta wada hadal iyo wanaag ku dhameysato, walaalaha isku ujeedada ah ee xoogaga yar ee sheydaadku soo galey isu doonistoodu waa wax waajib ah oo ka sii xoog badan oo ka sii waajibsan, waxaana aaminsanahay in wadadu isku soo dhici doonto, mar haddii ujeedooyinkii midaysan yihiin inta la kala maqnaan karo inaysan dheerayn baan filayaa.SomaliMirror:- Maxaad isleedahay oo la isugu keeni kara Isbahaysiga?

Jawaab:- Wax qabad ayaa la iskugu keeni karaa, waxaa loo sameeyay isbahaysiga ujeedooyin, haddii ujeedooyinkiisa xaqiiqsamaan oo laga run sheego oo ujeedooyinkii uu lahaa laga howl-galo lana fuliyo, waxaan isleeyahay taasaa noqon karta waxa ugu sahlan ee wadada la iskugu soo dhici karo, cidina ma dhahayso Itoobiya ha noo jooto, Itoobiya oo dalka joogtana oo dadkii dhibaysa oo xasuuq iyo Barakicin iyo waxa hadda Gobolada Dhexe iyo Baladweyne ka socda dhibka ay ku hayso cid dhahaysa gacmaha ha laga laabto oo madaxa ha laga salaaxdo ma jirto,marka intaas oo dhan waa ujeedooyin wada midaysan oo laga midaysanyahay, wax-qabadka ayaana dadka midayn kara.

Somalimirror:- saameyn intee la eg ayay ku yeelanaysaa kala Jabka isbahaysiga xoogaga ku sugan gudaha Dalka?

Jawaab:- Ma Aaminsani aniga hadda in Warar Idaacadaha ka baxa ay muqaawamada aragtidooda iyo ahdaaftooda midna leexin karto, waxa ay tahay waa wax cad oo lagu midoobay oo la iskugu yimid oo dadkana isku keenay, oo haday howshaas tagtana shaqooyin kale lakala qabsan doono oo lagu kala tagi doono ayaa jirta, dadka hadda meeshan iskugu yimid, Gumeysiga dhulka Haysta in laga saaro oo la nadiifiyo oo amni iyo cadaalad iyo horumar wadankaan wadadiisa loo jeexo ayay iskugu yimaadeen, marka ma aaminsani hadda aniga dadkii isku ujeedooyinkaas ahaa wax kala leexin kara waa haddii ay markii hore ujeedadu saxnayd lagana mideysnaa, ianay kala qeybsanto muqaawamada waa sida uu cadwgu rabo, Insha Allaahuna ma helayo, oo inta uu sal mugii u fadhiyo sarbida laga deyn maayo .

Somalimirror:- inta badan garabyada mujaahidiinta ee gudaha iyo garabka isbahaysiga Asmara waxay qaadaceen Heshiiskii DJibouti, hadaba la’aantood ma dhaqan galayaa Heshiiska aad gasheen.

Jawaab:- heshiiska la galay wuxuu ku saabsanyahay in Itoobiya Dalka laga saaro, marka waxaan isleeyahay haddii si dhab ah loo fikiro aniga ma ogi cid diidaysa in Itoobiya Dalka ha laga saaro, Itoobiya Dalka ha joogto heshiiska kuma jirto, Itoobiya Dalka ha laga saaro way ku jirtaa, marka walaalahana ma diidana, muqaawamaduna ma diidana in Itoobiya Dalka laga saaro, laakiin waxaa laga yaabaa tarjumaada iyo sida warka loo dhahayo iyo waxyaabaha mararka qaar fahm ahaan laga qaato warbaahinta waa lagu kala duwanaan karaa haday taasi hirgashana waa la wada hirgalinayaa.

Somalimirror: - Ma laga yaabaa in aad ka tanaasushaan heshiiskii Djibouti si loo badbaadiyo midnimada iyo jiritaanka Isbahaysiga?

Jawaab:- waxaan isleeyahay heshiiskaasi waxa uu ku dhisnaa in Itoobiya Dalka ha laga saaro nuxurka heshiiskaas oo dhan hal xabo waaye oo ah “Itoobiya Dalka ha ka baxdo”, marka Itoobiya Dalka ha ka baxdo in laga tanaasulo haday qumantahay taas ha la is weydiiyo .

Somalimirror:- sideed u aragtaa in uu xalku ku jiro?

Jawaab:- waxay ila tahay, ujeedooyin iyo ahdaaf baa waxan loo sameeyay, · ujeedooyinkaas iyo ahdaaftaas in laga wada shaqeeyo oo wadadaa la wada qaado ee laguna xaqiijiyo ujeedooyinkii loo sameeyay Isbahaysiga ayaanu isleenahay waa waxa ugu sahlan ee hadda la iskugu imaan karo.· mida kale xalku wuxuu ku jiro waxaa weeye wax-qabad.· xalka waxaa kaloo uu ku jiraa in la joojiyo adeegsiga warbaahinta khaldan, wada hadalka tooska ahna la abaaro wixii tabasho ahna halkaa sla geeyo. · qodobka kale waxay tahay qof kasta mas’uuliyad baa saaran, masuuliyada saaran waa in uu guto, cid ka cafinayso masuuliyadiisii ma jirto, mas’uuliyadiisii shakhsiga ahaydna waa in uu guto, midi mu’asadda ahaydna waa inuu gutaa, oo dhankiisa walaalnimada, midnimada iyo wada shaqeynta ka baadi-goobaa. · mida kale ee ugu danbeysa waxa ay tahay marka laga soo tago xaga Isbahaysiga, Midowga Maxaakiimta maamul dhisan oo masuuliyiin leh, ayuu ahaa waa in uu is weydiiyaa waxa dhacay maxaan ku leenahay ? markaa iayaguna waa in ay mas’uuliyadooda iyo waxa ay leeyahay..

Somalimirror:- Jabhadda Islaamiga Soomaaliyeed Waxa ay soo saartay Warsaxaafadeed ay iskaga fogaynayso Heshiiskii aad la gasheen DFKMG ah, sideed u aragtaan arintaas?

Jawaab:- Jabhaddu muqaawamada wax la taaban karo ayey ku soo kordhisay, haddii ay ahaan lahayd dhanka xanuunjinta cadawga, haddii ay ahaan lahayd anshaxa, kala dambeynta iyo la dhaqanka dadweynaha. Ujeedadii loo asaasayna way taagan tahay, waxaa ila haboon inaysan jabhaddu ku mashquulin hawl ay qeyb walaalaha ka mid ah gacanta kula jiraan, aanna Allah idinkii ku rajo weynahay inay ugu dambeynta hal waddo isla qaadi doonto. Waxaa intaa dheer inay jabahaddu odoyaal iyo meelo looga arrimiyo ayey leedahay waanna aaminsanahay inay ku filan yihiin hagidda masiirka Jabahadda. Sidaasi darteed su’aasha munaasibka ah waxa ay tahay sideen hadafkii weynaa ee aan isutaagnay u xaqiijin karnaa annnaga oo wada jirna? Waayo waa hubaal annaga oo kala soconna oo isku mashquulsan in aanan meel gaari Karin.

Somalimirror:- maxaad ugu Baaqeysaa shacabka iyo xoogaga Mujaahidiinta Soomaaliyeed?

Jawaab:- Waxaan ugu Baaqeynaa .

§ in Midnimada & walaaltinimadooda adkeeyaan.

§ qof kastana Mas’uuliyada Shakhsiyan u saaran uu qaato, oo uu ogaado in howshan aysan ahayn howl cid kaliya u taalo oo cid kaliya in ay wax wanaajiso laga sugayo, cid walba waa laga rabaa, qof kasta waxaa laga doonayaa in kaalinta uu ku leeyahay sidii dalkaan cadowga looga saari lahaa inuu qaato.

§ Waxaan kaloo ugu Baaqayaa xoogaga Muqaawamadana inay ogaadaana in howl-galkooda uu ku aadanyahay cadowga sidii Dalka looga saari lahaa insha allaah.

§ In dadweynaha dan yarta ah la taakuleeyo, loona turo, lana ogaado in dadweynuhu yahay lafdhabarta muqaawamada iyo shidaalkeedii.

§ Waxa kale oo aan ugu baaqayaa sida ay muqaawamada u taageereen inay nabaddana u taageeraan marka loo baahdo.

DhamaadHalkan ka akhriso waraysiga qeybtii 1-aad:-

http://www.somalimirror.com/2008/07/27/axmed-claahi-%e2%80%9ctallaabada-ay-walaaluhu-qaadeen-waa-khalad-siyaasadeed-oo-taariikhi-ah%e2%80%9d/#more-1316

www.somalimirror.com

 Daabaco         U dir saaxiib