SomaliMirror

Shabakadda Somalimirror waxa ay idiin soo gudbinaysaa waraysi dheer oo ay la yeelatay Xoghayaha Warfaafinta Isbahaysiga dib u Xoreynta Soomaaliya Axmed Cabdullahi Sheekh Maxamed oo ku sugan magaalada Djibouti.

Axmed Cabdullahi waxaanu ka waraysanay:-

B) Arinta xil ka qaadista ay sameeyeen garabka Isbahaysiga ee Asmara

T) Shirkii sanca iyo waxyaabihii ka soo baxay

J) Khilaafka Isbahaysiga waxa uu ku salaysan yahay iyo saameyntiisa

X) Iyo sida uu u arko xalka Soomaaliya waraysigan oo aad u dheeraa ayaan u kala qaybinnay labo qeybood, qeybta koowaadna waxay u dhacday sidatan soo socota:-

Qeybta 1aad

SomaliMirror:- Sideed u aragtaan garabkiinna Jabuuti arrinta xil ka qaadista ay idinku sameeyeen xubnaha ku sugan Asmara?

Jawaab:- Marka ugu hore waad mahadsan tahay, marka labaadna Isbahaysigu in uu garabyo kala yahay annagu ma’aaminsanin, arrinta ayaantan Wasaa’ilul- Iclaamka soo gashay oo walaalaha xaggooda ka soo yeertay waxaan u argnaa arrin aan munaasab ahayn, waana khalad siyaasadeed oo taariikhi ah, hase-yeeshee ma keenayso runtii in hadafkii Isbahaysiga loo aasaasay oo ahaa in cadwga laga xoreeya Dalka laga leexdo.

SomaliMirror:- Waa meeqa xubnaha Golaha Dhexe ee ku sugan Jabuuti?

Jawaab:- Shirka waxa uu ku furmay (106) xubnood,intuu socdayna waxaa ku soo biiray (12)xubnood, shaqa awgeedna waxaa loo fasaxay (17) xubnood.

SomaliMirror:- Ma dhici kartaa in idinkana aad casishaan xubnaha ku sugan Asmara?

Jawaab:- Runtii hadda arrinta saxda ah ma aha in loo dhaqmo ficil iyo radulficli ( fal iyo fal celis), Mas’uuliyaadka na saarani waxay tahay in aan ka fakarno maxaan qaban karnaa barrito, ee ma aha in aan ka fakarno burinta wax shalay dhacay oo la soo dhaafay, ee waa in aan ku mashquulno arrimaha maanta na horyaalla, oo ah sideen anagoo wada jirna uga mira dhalinnaa masuuliyaddii aan ummadda u qaadnay, tan aad leedahay wax ma casileysaan waxaan aaminsanahay in Isbahaysigu aanu isagu imaanin sida ay in badanba ka war qabaan xilal iyo wax qaybsi iyo nacfi isuguma uusan imaan, wuxuu isugu yimid qadiyad asaasi ah oo dadka ka dhaxaysa marka qadiyaddaas baa asal ah mooyaane in maanta xil iyo casilaad iyo dallacsiin iyo hanti & dhaqaale waxaas waxaan is leeyahay waxyaabaha iska dhaw dhaw oo aanan qadiyaddana waxba ka tarayn anaguna aannan maanta ka fakarayn weeye.

Waxaan ka fakaraynaa sidee cadawga dalka looga saaraa?

Sidee loo dardar gelin karaa Muqaawamada oo ay u qaadan kartaa kaalintii ay lahayd?

Sidee siyaasad ahaan guusha muqaawamada laga gaaray loo dhamaystiri karaa?

Sidee maanta dadka bannaanka iyo geedaha hoostooda jiifa loogu soo celin karaa guryahoodii?

Sidee dhiiga Soomaaliyeed ee daadanaya loo joojin karaa?

Waxa aan ka fikirayno waa arrimo noocaas oo kale ah cid kasta oo Soomaali ahna waa in ay maanta ka fikirto, shalay waa la soo dhaafay wixii shalay ahaa in ay maanta waqti naga qaataan diyaar uma nihin kamana fikirayno, walaalaheenna waxaan aaminsan nahay in aan isku hadaf nahay waxaan isku khilaafsan nahayna ay yihiin waddada loo marayo hadafkaas, marka waxaan isleeyahay sida saxda ah waxay tahay in hadafkii la wada toogto wasaa’isha iyo wadooyinka la marayo inaanay hadda macno badan lahayn in lagu mashquulo ayaan aaminsan nahay.

SomaliMirror:- Garabka Asmara waxay idinku eedeynayaan in aad ka weecateen siyaasaddii Isbahaysiga oo aad waddo kale qaaddeen, maxaad ka leedahay arrintaas?

Jawaab:- Haddii uu arrinku sida aad sheegtay yahay meelo loo bandhigo ayaa jirta, wixii dhaliil iyo is-dhaliilid ah waxay leedahay golayaal looga hadlo, warbaahintuna wax ay ka riddo mooyee waxba kuma soo kordhinayso, wixii la kala tabanayo mar hadii jismi mid ah ama urur la yahay ama Isbahaysigu maamul iyo nidaam leeyahay meelo lagu kala cawdo oo la isku dhaliilo oo la isku canaanto oo la’isku toosiyo oo la’isku saxo ayaa jira marka waxaan isleeyahay wixii dhaliil ah iyo wixii canaan ah meelahaas ayay gali karaan.

Dhanka kale wax kasta oo la kala tabanayey mar haddii uu ka danbeeyay kulan la’isugu yimid oo lagu wada hadlay waxaan is leeyahay tabashadaasi meesha way ka baxaday. Tan kale haddii eeddu ahayd siyaasaddii iyo xeerkii Isbahaysiga ayaa meel looga dhacay, waxa ay walaaluhu ku tallaabsadeen muxuu noqonayaa?

Waxaan aaminsananahay tillaabada ay walaaluhu qaadeen in laga haboonaa si kalena wax loo dhigi karay, waxaa kale oo aan aaminsananay inay maamulkii GMMIS uu meel ka dhac ku yahay, tan kale qodobadii Sanca looga wada hadlayey marnaba ma soo gelin madaxtinmada Isbahaysiga iyo tan GMMIS, sidaasi darteed waxaan isleeyahay wixii la isku haystay oo warbaahinta galay wax ka sii weyn ayaa lala baxsaday, taas ayaana u baahan in majaraheedii lagu soo celiyo.

SomaliMirror:- Maxaad ka aaminsan tihiin Dowladda Eritrea hadda oo aad ku sugan tihiin Jabuuti?

Jawaab:- Xiriirka labada shacbi ma aha mid maanta bilawday, waa xiriir taariikhi ah oo soo jireen ah, waxaanna ku jiraa inta rumeysan in xiriirkaasi uu mudan yahay in la sii hormariyo oo aan wax loo dhimin, xukuumada ahaan aad baan uga mahad celinaynaa wixii ay na tareen waanna xasuusnaan doonnaa, hase-yeeshee waxa ka dhacay xaruntooda kuma eed la’a.

SomaliMirror:- Maxaa ka soo baxay Shirkii Sanca oo lagu heshiiyay?.

Jawaab:- Shirka Sanca wuxuu ahaa shir muhim ah oo muddo la qaban qaabinayay waqtina lagu bixiyay kharashna lagu bixiyay, dad mas’uuliyiin ah oo muctabariin ah oo qadiyadda dadkii iska lahaa ahna ay isugu yimaadeen, runtiina si saraaxad leh ayaa loo wada hadlay, wixii laga wada hadlay oo 3 qodob u qayb sanayd oo ahayd:- ¨

1) Wixii ka horeeyay heshiiskii Jabuuti

2) Heshiiska Jabuuti laftiisa

3) Iyo Istiraatiijiyadda Mustaqbalka.

Waxa muhiim ah oo farxad lahayd in dadkii isugu yimid meesha ay isku aragti ka noqdeen in midnimadu ay lagama maarmaan tahay, waxa meesha loo tagayna ay tahay heshiis, qodobadii lagu soo qaaday shirkana qaar ka mid ah waxaa lagu dhameeyey tanaasul iyo is afgarad qaarna waa la kala xukunsaday, ugu dambeyntiina waxbaa la kala saxiixday., marka aniga waxaa ila haboonayd in juhdi badan lagu bixiyo sidii wixii la kala saxiixday loo dhaqan gelin lahaa.

SomaliMirror:- Idinku waxaad sheegteen in la heshiiyay garabka kalana waxay sheegeen in aan la heshiin siday isku qabanaayaan labadaasi war?

Jawaab:- In la heshiiyey way caddahey oo wax baa lagu heshiiyey oo waxna waa la kala qortey ,marka hadey soo baxdey lama heshiinin taasi meel loo daba galo bey leedahey, waxaa la waydiinayaa cidi sheegtay in aan la heshiinin, tan kale meesha waxa loo tagay waxa ay ahayd in la heshiiyo ficlanna way dhacay heshiiski.

SomaliMirror:- Haddii aad heshiiseen maxaad u soo saari waydeen qoraal rasmi ah oo aad u midaysan tihiin?

Jawaab:- Waana la heshiiyey qoraalna waa la kala qortay, laakiin dadka waxa khuseeya iyo waxa xafiisyada iyo inta wax ka dhexeeyaan khuseeya waa kala duwan yihiin, waxaa bulshada Soomaaliyeed khuseeyay in loo sheego in la heshiiyey taasna shaki kuma jirin, laakiin wixii kale ee document ah waxay gaar u ahayd inta ay khuseysay shakhsiyaad iyo mu’asasaadba waana gaartay.

SomaliMirror:-Yaa dhex dhexaadinayay shirka Sanca?

Jawaab:- Walaalahu iyaga uun baa hadda is dhex dhexaadinayey, walaalo ka yimid meelo kala duwan oo hawsha u yimid, oo howsha wax ku lahaa oo dhinacyo badan ahaa ayaa isla wada joogey, markaa dhexdhexaadin lagu qanacsan yahay oo la isla gartay oo laba dhinacba agtooda muhiim ka ahaa, kuna qanceen ayaa howsha wadey, waana ka mahadcelineynaa munaasabaddan dadkii juhdiga badan ku bixiyey ee howshaas qabtey ee harsi iyo hurdaba ka tagey intii ay hawsha wadeen, waxaan kaloo jecelnahey in aanu u mahadcelino dowlada yaman oo iyada lafteeda fursadan bixisey in wadankeeda lagu wada hadlo faragelin iyo tadakhul kalena aan ku yeelan arimahayaga ee noo deysay in aan isu madax banaano oo arimahayaga dhameysano, waxaan iyada jeclahey in shacabiga Soomaaliyeed ee sugayey muddo badan in heshiiskaas la gaaro in aan iyaga laftooda uga mahadcelinno dulqaadkoda, intaa ka dib waxaa xaqiiqo ah in ay tahey maanta meesha aan u socono in cadowga dalka sidii looga saari lahaa, sidaas darteed waa in la mideeyaa qowl iyo ficil, talo iyo wax dheef waxaanna is-leeyahey in maanta lagu mashquulo wixii la soo dhaafey waxba tari mayso, waan ku celinayaa mar kale waxba tari meyso ee meesha aan hadda aan joogo xageen uga soconaa ayey tahey in laga tashado.

SomaliMirror:- Ciidamada gumeysiga Itoobiya waxa uga haray mudadii aad DFKMG ah kula heshiiseen in ay wadanka uga baxdo 72 maalmood, ma aaminsan tahay in ay muddadaas ku baxayaan?

Jawaab:- Heshiiska la soo qaaday waxa uu nuxurkiisu yahay Ciidamada Ethiopia dalka ha ka baxaano waana la muddeeyey, waxaan rajeynayaa in ay sidaasi noqoto oo Ethiopia dalka nooga baxdo, waxaadna ogaanaysaa Ethiopia dalka inay qabsato maanta kuma dhalanin ee waa arrin ay in badan ku taameysay ,una raadinaysay inay u hesho garab siyaasadeed, mid ciidan iyo mid dhaqaale ficlanna waa u heshay, markaa in geedkii ay fuushay salka laga soo gooyo arrin sahlan ma aha.

Tan kale inay baxdo oo la soo afjaro dhibaatada joogitaankeeda ka dhashay waa wax fiican, haddiise ay bixi weyso arrintu waxa ay noqonaysaa (fa in cuttum cudnaa).

La soco Qeybta 2-aad Insha Allaah

www.somalimirror.com

 Daabaco         U dir saaxiib